Smnewstl.com | Brunei Darussalam, 22 Abril 2026 — Timor-Leste reafirma ninia papel estratéjiku iha diplomásia seguransa alimentár liuhosi partisipasaun ativa iha FAO Regional Conference for Asia and the Pacific 38th Session, ne’ebé realiza iha Brunei Darussalam, ho partisipasaun husi nasaun 46 iha rejiaun Ázia no Pasífiku.
Delegasaun Timor-Leste lidera husi Ministru Agrikultura, Pecuária, Peska no Floresta, Marcos MAMETA da Cruz, ne’ebé reprezenta interese nasionál no fortalece relasaun kooperasaun ho parseiru internasionál sira.
Partisipasaun ida ne’e reflete komitmentu forte husi IX Governu Konstitusionál atu integra Timor-Leste iha diskusaun global kona-ba agrikultura sustentável, seguransa alimentár no dezenvolvimentu rural.
Iha sesaun ministeriál nivel aas, líder sira diskute prioridade estratéjika inklui transformasaun agrikultura, ekonomia azul, no impaktu konflitu global — partikularmente iha Mediu Oriente — ba sistema ai-han mundiál.
Iha intervensaun ofisiál, Timor-Leste destaca prioridade prinsipal sira hanesan:
Fortifikasaun seguransa alimentár nasionál
Aumentu produsaun agrikultura organiku
Dezenvolvimentu rekursu umanu
Investimentu iha infraestrutura irigasaun no baragen
Promosaun dezenvolvimentu rural sustentável
Governu mos rekoñese katak limitasaun finansiamentu no kapasidade institusionál sei kontinua sai dezafiu boot. Tanba ne’e, Timor-Leste valoriza tebes fokus konferénsia ida ne’e kona-ba finansiamentu inovativu, apoiu tékniku no transferénsia teknologia hanesan fator krusiál ba transformasaun setor agrikultura.
Iha área saúde animál, Timor-Leste subliña importánsia prevensaun no kontrolu moras animál liuhosi servisu veterináriu, sistema vigilánsia no kooperasaun rejionál atu proteje seguransa alimentár.
Aleinde ne’e, governu reafirma importánsia koperasaun ho parseiru estratéjiku sira inklui Food and Agriculture Organization atu promove inovasaun, kapasidade institusionál no jestaun sustentável ba rekursu naturál.
Durante konferénsia, delegasaun Timor-Leste mos realiza enkontru bilateral ho nasaun sira iha rejiaun atu esplora oportunidade kooperasaun iha setor agrikultura, peska, pecuária no floresta, medida ne’ebé importante atu hametin relasaun diplomátika no aumenta apoiu ba dezenvolvimentu nasionál.
Partisipasaun ida ne’e konfirma komitmentu governu atu servisu hamutuk ho komunidade internasionál hodi asegura seguransa alimentár, hasa’e produtividade no promove bem-estar ba povu Timor-Leste. (/SMnews)
Komentariu