SMNewstl.com | VIQUEQUE, 28 Marsu 2026 – Koordenadór Januário Soares husi FRETILIN iha Munisípiu Viqueque deklara katak kuadru sira husi partidu ne’e fó apoiu total ba polítika IX Governu Konstitusionál, liuliu iha implementasaun desentralizasaun poder lokal ne’ebé lidera hosi Primeiru-Ministru Kay Rala Xanana Gusmão.
Deklarasaun ne’e hato’o iha atividade Avaliasaun Kondisaun Mínima ne’ebé realiza iha Munisípiu Viqueque, ho objetivu atu hare no sukat prontidaun autoridade lokal sira atu implementa polítika desentralizasaun.
Tuir Januário Soares, polítika desentralizasaun poder lokal importante tebes atu haforsa governasaun iha nivel munisípiu, hodi garante servisu públiku ne’ebé efisiente no besik liu ba komunidade.
Nia hateten katak Fretilin iha Viqueque sei kontinua suporta inisiativa governu nian ne’ebé fó prioridade ba dezenvolvimentu lokal.
Iha fatin ne’ebá, nia mos husu ba kuadru sira hotu atu servisu hamutuk ho governu no autoridade relevante sira, atu asegura implementasaun polítika ne’e bele lao ho di’ak no lori benefísiu diretu ba povu.
Atividade Avaliasaun Kondisaun Mínima ne’e hanesan parte husi esforsu governu atu prepara estrutura no rekursu iha munisípiu sira, antes implementa efetivamente sistema desentralizasaun iha rai-laran.(/SMnews)
Komentariu