TL-Malázia Selebra Akordu Kooperasaun iha Ámbitu Dezenvolvimentu Rural.

Smnewstl.com — Ministru Negósius Estranjeirus no Kooperasaun, Bendito dos Santos Freitas reprezenta Vise Primeiru-Ministru no Koordenador Asuntu Sosial no Ministru Dezenvolvimentu Rural no Abitasaun Komunitária, Mariano Assanami Sabino asina Memorandu Entendimentu ida ho Vise-Primeiru-Ministru no Ministru Dezenvolvimentu Rurál no Rejionál, Honourable Dato’Seri Ahmad Zahid Bin Hamidi, iha ámbitu dezenvolvimentu rural.

Memorandu Entendimentu ne’e asina iha okaziaun simeira ASEAN ba dala 47 iha Kuala Lumpur Malázia, no Timor-Leste nia admisaun formal istórika iha fraternidade ASEAN nu’udar membru ba dala 11.

Ministru Negósius Estranjeirus no Kooperasaun, Bendito Freitas hateten, antes ne’e iha ona konkordánsia entre Vise-Primeiru-Ministru, Mariano Assanami Sabino ho nia omológu Honourable Dato’Seri Ahmad Zahid Bin Hamidi mak atu asina iha Malázia, maibé la konsege tanba Vise-Primeiru-Ministru Koordenadór Assuntus Sosiál laiha.

Governante ne’e hatutan, akordu ne’e konsideradu istóriku tebes, tanba liu tiha loron Timor-Leste nia adezaun formal ba ASEAN mak nasaun rua selebra MoU refere.

“Depois de ita-nia adezaun formal ba ASEAN, ita fila ba aspetu importantes iha ekonomia produtiva hanesan setór agrikultura, dezenvolvimentu rural ne’e importante tebes ba Timor-Leste atu bele kumpre ba kritériu ASEAN nian,” dehan Ministru Bendito Freitas hafoin remata asinatura iha salaun Mandarin Oriental, Kuala Lumpur, Malázia.

Memorandu Entendimentu ida-ne’e refleta nasaun rua nia kompromisu hamutuk atu avansa kooperasaun iha dezenvolvimentu rurál, no atu hametin ligasaun hosi ema-ba-ema entre nasaun rua ne’e.

Objetivu prinsipál husi MoU ne’e, mak atu hametin kooperasaun bilaterál iha ámbitu dezenvolvimentu rural iha área importante hirak hanesan, Dezenvolvimentu Kapitál Umanu: Dijitalizasaun: Hakbiit Ekonómiku: No mos Promosaun kona-ba eko no agro-turizmu.

“Ninia importánsia iha área dezenvolvimentu ruál, ne’e importante teb-tebes ba ita-nia dezenvolvimentu Timor-Leste, tanba poténsias dezenvolvimentu ekonómika ninia baze mak ekonomia rural, tanba ne’e mak Malázia fahe ninia esperiénsia katak, durante dékada 6 sira luta par atu tau sistema teknolojia ba dezenvolvimentu sira ohin loron sira bele sai nasaun ida avanasadu no produtivu iha ekonomia rural,” tenik tan.

MoU refere mós simboliza Timor-Leste ho Malázia nia kompromisu ne’ebé fahe no inísiu ba kooperasaun ida ne’ebé signifikativu. .(*Smnews)