TL Deside Lutu Nasional ba Antigo Presidente Republika Portugueza Jorge Sampaio Nia Mate Durante Loron 3

Smnewstl.com 13-09-2021,(Dili)-Governo liu husi sorumutu Estraordináriu Konsellu Ministrus, iha loron 13 fulan-setembru tinan 2021, delibera ona atu dekreta Luto Nasionál ba antigu Prezidente Repúblika Portugeza Jorge Sampaio nia mate, iha teritóriu nasionál laran tomak, ba períodu loron tolu, to’o tuku 07.59 loron 16 fulan-setembru.

Tuir komunikado ne’ebe SMNews asesu komfirma, durante períodu lutu nasionál, bandeira nasionál sei hasa’e to’o klaran de’it ka meia haste iha país laran tomak, iha fatin sira uzu obrigatória nian.

Jorge Sampaio, mate iha loron 10 fulan-setembru, ema ida ne’ebé maka relevante tebes hodi defende povu no valór konstitusionál Timor nian.

Primeiru Ministru, iha loron sesta, afirma katak Jorge Sampaio “hanesan Prezidente ida ne’ebé kontribui maka’as ba Restaurasaun Independénsia Nasionál, iha ne’ebé nia mai nu’udar konvidadu da onra iha serimónia ne’ebé hala’o iha loron 20 fulan-maiu tinan 2002”. Xefe Governu mós hateten tan katak “Eis Prezidente Jorge Sampaio sei lembra iha Mundu nu’udar figura boot iha kauza no liberdade no rekoñese nu’udar Belun Boot Timor-Leste no timoroan nian”

Iha tinan 2016, Jorge Sampaio simu Grande Kolar Ordem Timor-Leste, nu’udar rekonesimentu ba ninia solidariedade no apoiu ativu” iha luta ba independénsia ita-nia país. Kondekorasaun ne’e entrega husi Primeiru Ministru atuál ne’ebé iha momentu ne’ebá hanesan Prezidente Repúblika, Taur Matan Ruak, iha Lisboa. Iha Okaziaun, Taur Matan Ruak manifesta “rekoñesimentu kle’an ba umanizmu, espresaun solidariedade ne’ebé barak tebes no apoiu ativu durante tinan barak, fó-moris ba luta ba liberdade, autodeterminasaun no independénsia Timor-Leste nian”.

Iha ninia vizita ikus nu’udar Xefe Estadu, iha tinan 2006, Parlamentu Nasionál atribui ba Nia títulu Sidadaun Onoráriu Repúblika Demokrátika Timor-Leste.

Porta-Vóz Governu nian, Ministru Fidelis Magalhães, iha loron sesta semana kotuk, aprezenta kondolénsia ba família no belun ies-Prezidente no afirma katak “Jorge Sampaio sempre rekordadu husi povu timor ba ninia kompromisu ne’ebé kle’an ba direitus umanus, justisa no solidariedade.(/*ant)