Saudozu Ma’huno Nia Isin Mate Halot Ona Iha Jardin Eróis Metinaro

Smnewstl.com 26-09-2021 (Dili) – Tersa-feira ohin, família hamutuk ho estadu Timor-Leste, halot ona saudozu António João Gomes da Silva alias ‘Ma’huno Bulerek Karathayano’ iha fatin deskansa ikus nian iha jardin eróis Metinaro.

Molok halot iha fatin deskansa ikus ne’e, família ho estadu, lori uluk bá Igreja karedral Dili, hodi halo requem bá saudozu Ma’huno.

Hafoin remata misa, família matebian ho estadu mós translada kedas saudozu Ma’huno Bulerek Karathayano nia isin mate bá rai moris fatin postu administrativu Laleia munisípiu Manatuto, hodi halo tuir serimónia kulturál tuir lisan matebian nian.

Nune’e, tuir observasaun katak, hafoin fila husi moris fatin postu administrativu Laleia iha tuku 2 meudia ne’e, bainhira to’o iha Jardin Eróis Metinaro, ne’ebé simu akompaña marsa husi FALINTIL Forsa Defeza Timor-Leste (F-FDTL).

Antes hatun bá kampa ou rai kuak, Vise Prezidente Konsellu Fiskál Konsellu Kombatentes Libertasaun Nasionál (KKLN), Maria Paixão ‘Bisiba’, lee sai dekretu Prezidente Repúblika, Francisco Guterres Lú-olo.

No saudozu António João Gomes da Silva ‘Ma’huno Bulerek Karathayano’ nia biagrafia lee husi eis Kolaborador Estadu Maiór, José Agostinho Sequeira ‘Somotxo’. No saudozu nia mós hetan bensaun husi reverendu Padre Ângelo Salsinha.

Prosesu funerál bá saudozu Ma’huno Bulerek Karathayano ne’e mós akompaña ho kruzae armas husi F-FDTL, no mós Xefe Estadu entrega bandeira nasionál bá saudozu nia oan mane.

Entretantu, saudozu Ma’huno Bulerek Karathayano, hakotu iha Ospitál Naisonál Guidu Valadares (HNGV), tanba sofre moras komplikadu.(anto)