Ramos Horta ba PR, Hasae Reputasaun TL Iha Mundo Internacional

SMNewstl Media Online-Hela deit ona fulan sia, mandatu Presidente Republika liderado Francisco Guterres Lu-Olo sei termina.

Oras ne’e dadaun, naran hirak nebe hahu harame iha media social Facebook maka Armanda Berta dos Santos, Presidente Partido Khunto, nebe ofisialmente anunsia ona ninia kandidatura, Padre Martinho Gusmao, Antonio Benevides, timoroan potensia ida husi Partido PUDD, Virgilio Guteres, Xefe Estado Major General, Lere Anan Timor no seluk tan.

Hare ba situasaun atual rai laran, parte akadenista observa katak, karik Eis Presidente Republika Jose Ramos Horta maka hakarak avansa mos hanesan kandidatura ida automatikamente sei harame liu tan festa demokrasia ne’e.

Estanislau Saladanha, Eis  Reitor Dili Institut of Techonologi konsidera, Ramos Horta diak. Tamba iha vizaun luang, hamosu balansu entre partidu politiku ho lider politiku sira.

“Nia ema ida kumpri regra konstitusional, bele asegura Timor Leste nudar nasaun direitu demokratiku,”tenik Akademista ne’e

Estanislau fundamenta, Presidente Republika nudar aman ho simbolu nasaun, tamba ne’e Horta bele hasae reputasaun Timor Leste iha mundu internasional, liu-liu ho nasaun vizinhu Australia ho Indonesia.

“Buat seluk maka Horta mos bele servisu diak ho Maun boot Xanana Gusmao, Igreija, ho partidu politiku hotu, nunee fasil hodi halo transformasaun jerasional nebee diak. Karik Ramos Horta sai Presidente no governu Partido liderado Kay Rala Xanana Gusmao maka sei hahu halo dezenvolvimentu oi-oin iha area justisa, politika, ekonomia no konklui fronteira ho Indonesia”.

Akademista ne’e mos observa katak, fora husi Ramos Horta, figura seluk nebe diak mos maka Rui Maria Araujo. Nia iha kapasidade intelektual, esperiensia politika nebe tulun hodi sai Presidente Republika. Aliende ne’e, Rui mos iha relasaun diak ho partidu politika ho igreja.

Husi timoran potensial nebe naran hahu harame media social so Armanda Berta dos Santos maka ofisaliza ona ninia kandidatura ba publiku. ((Rio)