Pagamentu Subsídiu Bá Jornalista Hein Publikasaun Jornál Repúblika

Smnewstl.com 03-01-22 (Dili) — Ministériu Assuntu Parlamentar Komunikasaun Sosiál (MAPKOMS) seidauk bele halo pagamentu Subsídiu suplementu remuneratóriu bá profisionál jornalista sira, tanba sei hein publikasaun dekretu-lei lei iha jornál Repúblika.

Prezidente Repúblika (PR), Francisco Guterres Lú-olo, promulga dekretu-lei kona-ba subsídiu suplementu remuneratóriu bá profisionál jornalista sira iha loron 31 Dezembru tinan 2021, ne’ebé governu submete bá Gabinete Prezidénsia Repúblika.

Ministru MAPKOMS, Francisco Jerónimo hateten, dekretu-lei ne’e, iha tinan ikus 2021, tamba ne’e bainhira publika ona iha jornál Repúblika, maka MAPKOMS sei haruka bá Sekretariadu Fundu Covid-19 Ministériu Finansas hodi halo pagamentu.

“Prezidente Repúblika promulga dekretu-lei ne’e iha 31 Dezembru koinside loos ho loron ne’ebé mak remata ona tinan, hahú ohin bá ami halo prosesu bainhira publika ona iha jornál Repúblika ami komesa halo ona prosesu bá Sekretariadu Fundu Covid-19 par atu halo últimu prosesu hodi halo pagamentu,” informa Ministru MAPKOMS, Francisco Jerónimo, iha Farol, Dili, segunda ne’e.

Lista benefisiáriu jornalista sira-ne’ebé atu hetan direitu front line ne’e, Diresaun Nasionál Disseminasaun Informasaun (DNDI) ho Sentru Informasaun Integradu Jestaun Krize finaliza ona hafoin MAPKOMS hasai despaixo hodi haruka bá Ministériu Finansas hodi bele halo pagamentu.

“Ha’u hanoin atu rekolla lista sira-ne’e, DNDI mak iha knár halo hela ona ho sentru informasaun jestaun krize hotu ona, atu nune’e hein aprovasuan despaixu ikus husi Ministru bá, atu nune’e ikus liu bá iha Sekretariadu Fundu Covid-19 hodi halo pagamentu,” relata nia.

Entretantu, tuir dekretu-lei ne’ebé promulga ona husi Xefe Estadu ne’e, sei selu subsídiu bá kada jornalista dólar 3 5 kada loron, ne’ebé sei selu husi fulan Abríl to’o fulan Dezembru 2021.

Subsídiu refere atribui bá profisionál jornalista sira, tanba jornalista sira presta ona servisu profisionál hodi fó informasaun bá públiku kona-ba prevensaun pandemia Covid-19 durante situasaun estadu emerjénsia.(ant)