Kontra Kodiki Transito, HI Lux Hurlele Mazda Demio

Smnewstl.com 13-09-2021 (Dili) — Iha Domingu kalan (12/09/21) mais ou menus tuku 7 ho balun, mosu asidente tráfiku ida iha parte kolmera entre kareta Mazda Demio ho kareta Hilux, maibé la rezulta ema ruma mak lakon vida.

Komandante Polísia Tránzitu Nasionál, Inspetór Xefe, Domingos Sarmento Gama haktuir, asidente ne’e akontese tanba, kareta Hilux ho xapa matíkula A 13-148 mai husi diresaun ministériu justisa bá katedral, no kareta Mazda Demio ho xapa matríkupa A 22-686 husi diresaun kolmera bá EDTL nian.

Iha Sumafro (lampu merah) fó prioridade bá kareta Mazda Demio ultrapassa, enkuantu kareta Hilux refere viola lampu mean obriga tama hodi rezulta asidente refere.

“Asidente ne’e akontese hodi kalan porvolta 7:30 involve suspeitu inisiál ICF ne’ebé mak kondús kareta Hilux soke kareta Nissan Demio.

Kareta Mazda mai husi diresaun kolmera parte Matadoru diresaun EDTL, enkuanto Hilux husi diresaun ministériu justisa bá diresauun katedral,” informa Inspetór Xefe Domingos Gama iha servisu fatin Komandu Polísia Munisípiu Dili, Segunda ohin.

“To’o iha kruzamentu sumafro (lampu merah), kareta Nissan ne’e nia prioridade, tanba sumafro ne’e azul ona, maibé kareta Hilux mos ultrapssa deit, entaun provoka asidente,” hatutan nia.

Gama hatutan, asidente ne’e la rezulta ema ruma mate, maibé vítima husi kareta Nissan Mazda Demio ne’ebé hanesan mós membru PNTL ida mak kanek iha parte ulun, no nia kaben ho oan sira kanek kaman, oras ne’e dadauk halo ona tratamentu iha ospitál nasionál guidu valadares.

“Laiha mate, só kondutór na’in mak kanek iha parte ulun ho nia kaben mak kanek iha parte liman, vítima nia oan minor idade mak trauma, kareta Nissan Demio ne’e membru PNTL ida ho ninia kaben ho ninia oan, kanek lori duni bá ospitál nasionál halo tratamentu hela sei buka tuir hela oinsá mak ita bele hetan loloos,” dehan nia.

Hafoin akontese, polísia detein kedas kondutór kareta Hilux iha sela detensaun komandu PNTL munisípiu Dili nian, nune’e bele halo investigasaun hodi aprezentasaun bá ministériu públiku, nune’e bele kontinua bá tribunal hodi hetan desizaun ruma.

Oras ne’e dadauk, kareta Hilux polísia asegura ona iha komandu PNTL munisípiu Dili, enkuantu kareta Nissan Demio sei para hela iha fatin akontesimentu kolmera, maibé parte polísia seidauk bele foti, tanba kondisaun kareta refere roda kleuk hodi no labele halai.

“Suspeitu hodi kalan ita detein iha komandu PNTL munisípiu Dili, kareta vítima sira-nian sedang Demio ita labele lori, tanba so’e sa’e bá (trotoar) leten roda sira kleuk hotu, entaun Nissan Demio ne’e sei iha hela local asidente,” tenik DOmingos.

Ho akontesimentu refere, Inspetór Xefe Domingos Gama, husu sidadaun sira atu respeita kódiku estrada bainhira kondús kareta no motor, nune’e evita asidente iha dalan.(ant)