Horta: Governu Gasta Osan Covid-19 ‘Arbiru’ De’it

Smnewstl.com 02-12-2021 (Dili) – Eis Prezidente Repúblika (PR), José Ramos-Horta hateten, oitavu governu konstitusionál hahú husi tinan 2020 gasta osan lubuk ida ‘arbiru’ de’it, tanba orsamentu bá Covid-19 ne’e barak liu gasta bá perdiem.

Tuir Horta, loloos, osan bá Covid-19 ne’e merese bá ema ne’ebé servisu iha liña frente hanesan, pessoál hamos rai iha ospitál, pessoál saneamentu raut lixu iha ospitál no seluk tan, tanba sira-ne’e mak vida ameasadu liu bá Covid-19.

“Iha governu atuál osan lubuk ida ona hahú iha iha 2020, osan bá Covid-19 perdiem mak barak liu la’ós bá ema ne’ebé liña frente duni bá Doutór enfermeiru sira bá kuitadu motorista ambulánsia sira, bá sira-ne’ebé hamos rai iha ospitál ne’e, sira-ne’e mak liña frente duni la’ós Doutór de’it. Sira-ne’ebé hamos rai iha ospitál ne’e, sira-ne’ebé foti lixu iha ospitál nian perigozu teb-tebes,” dehan Eis PR, Ramos-Horta, hafoin abertura bá Serimónia Dili Dialogue Forum 2021, iha Salaun Delta Nova, kinta ne’e.

Ramos-Horta hatutan, governu gasta osan barak demais bá membru FALINTIL Forsa Defeza Timor-Leste (F-FDTL) ho Polísia Nasionál Timor-Leste (PNTL) liu husi subsídiu liña frente Covid-19 nian.

Tuir Horta, loloos membru F-FDTL ho PNTL sira la merese atu hetan subsídiu liña frente ne’e, tanba ne’e sira-nia servisu duni, maibé presiza fó apoiu de’it bá sira-ne’ebé hala’o servisu iha fronteira.

“Agora ha’u rona, ema lubuk ida F-FDTL, PNTL hotu-hotu simu perdiem, eipa mais afinál buat ne’e ita-nia servisu, Polísia nia servisu mak ida-ne’e, kuandu iha problema ruma, o tenki reforsa iha kontrolu, klaru sira ne’ebé bá fronteira ne’e tenki servisu kalan, udan loron tenki servisu, entaun buka fó apoiu, mais ha’u haree perdiem barak demais bá forsas sira bá PNTL, depois sira servisu ne’eduni sira lakon morál,” lamenta Horta.

Entretantu, Kona-ba Orsamentu Jerál Estadu (OJE) bá tinan 2022 ne’ebé daduak ne’e governu ho Parlamentu Nasionál (PN) hahú debate ona iha jeneralidade.

Horta afirma, nia seidauk akompaña diskusaun OJE 2022 ne’e, maibé kompremete sei akompaña.(ant)