Smnewstl.com (Dili) — Primeiru-Ministru (PM), Taur Matan Ruak, preukupa ho problema númeru ma-nutrisaun iha Timor-Leste ne’ebé atinji 36% no desnutrisaun atinji 22% iha nível mundiál.
Iha lansamentu bá programa prémiu nasionál nutrisaun, Xefe Governu, Taur Matan Ruak konsidera, programa ne’e importante tebes, nune’e bele servisu hamutuk ho parseiru sira kombate ma-nutrisaun no problema seguransa alimentár iha Timor-Leste.
“Eventu ida-ne’e importante loos, presiza ita hotu nia apoiu, ita hotu nia tulun, ita hotu nia kooperasaun sé ita hakarak problema rua seguransa alimentár no ma-nutrisaun lakon iha ita-nia rain, laiha prosesu ida ké ema ida ou grupu ida mesak bele hetan susesu, satán problema sosiál presiza iha parseria boot la’ós de’it ita timoroan sira, mais liu-liu mós ita-nia parseiru sira bilaterál no multilaterál,” dehan PM Taur, iha diskursu hafoin lansa programa refere iha salaun City 8 Manleuana Segunda (09/08/021), Dili.
Xefe Ezekutivu ne’e hatutan, haree hahú gráfiku seguransa alimentár no ma-nutrisaun iha Timor-Leste tama ona iha nível ida prekupante tebes.
“Sé ita haree iha seguransa ai-han iha nível mundiál ne’e 28% sé haree iha Ázia 24%, sé ita haree iha sudeste Aziátiku 18%, sé ita haree iha Timor-Leste 36%, ne’e kona-ba seguransa alimentár nian, 36% ne’e númeru ida boot. Sé ita haree fila-fali bá desnutrisaun ne’e nível mundiál 22%, Ázia 22%, Sudeste Aziátiku 27%, Timor-Leste 47.1% besik 50%,” dehan PM Taur.
Hanesan eis Vise Komandante Ein-xefe das Falintil no eis Jenerál, PM Taur dehan, nia preukupa tebes, tanba hanesan eis militár forsa mak ema, mas iha kañiaun, kilat, maibé kuandu ema fraku no sa’e foho labele, maka sei mate hotu.
Maibé nia haktuir, iha jerasaun rua mak iha ligasaun bá malu, tanba jerasaun ida mak halo funu to’o ukun-aan, no jerasaun seluk mak kontinua lori dezenvolvimentu bá nasaun.
“Agora ita harii nasaun, dezenvolve ita-nia nasaun iha tempu ida ké jerasaun sira tenki servisu makas, jerasaun rua liga malu, ida ké halo funu par manán funu no harii nasaun, ida seluk dezenvolve, jerasaun rua ne’e partilla preukupasaun boot ida,” tenik nia.
Programa Nasionál Nutrisaun nian ne’ebé implementa ona husi Sekretariadu Nasionál SUN Movement Nasoins Unidas nian ne’ebé iha kolaborasaun ho Membru sira Komisaun Interministeriál Seguransa Alimentár nian (KONSSANTIL), ne’ebé tutela iha lideransa husu Ministériu Agrikultura no Peskas.
Prémiu Nasionál ida ne’ebé konta ho apoiu Finanseiru jenerozu ho U$S 100.000 (dolar amerikanu rihun atus-ida) husi Programa Alimentasaun Mundiál (WFP) no ho apoiu tékniku husi Parseiru sira Dezenvolvimentu nian, nasionál, internasionál sira, liuliu husi Fundu Nasoins Unidas nian ba Infánsia (UNICEF) no husi Departamentu Asuntus Externus Austrália nian (DFAT).(ant)
Komentariu