Smnewstl.com | Bobonaro, 04 Novembru 2026- Komandu Polísia Nasionál Timor-Leste (PNTL) Munisípiu Bobonaro konsege kaptura joven ida no identifika membru Forsa Defeza Timor-Leste (F-FDTL) ida, relasiona ho insidente asaltu malu ne’ebé akontese iha área Memo, Munisípiu Bobonaro, iha loron 2 Novembru 2026.

Komandante PNTL Munisípiu Bobonaro Superintendente Xefe Damião da Silva Correia esplika katak insidente ne’e akontese kuaze tuku 18:00 lokraik, bainhira komunidade sira halibur iha rate matebian atu sunu lilin no tau ai-funan, nu’udar parte husi Selebrasaun Loron Finadu.

ADVERTISEMENT
SCROLL FILA BA NOTISIA


Tuir Komandante ne’e katak ,Iha momentu ne’ebá, membru F-FDTL ida ne’ebé partisipa iha atividade ne’e hetan tebe hosi kotuk husi joven balu nune’e Membru militar ne’e la simu asaun hirak ne’e no halo reasaun hasoru joven sira, ne’ebé ikusmai hamosu konflitu no asaltu malu entre grupu rua.

Lee Mós:
CEO BNCTL : Papel Banco Atu Asegura Kreximentu Ekonómiku no Dezenvolvimentu Ekonomia Sustentável

Depois simu informasaun kona-ba insidente ne’e, ekipa konjunta kompostu hosi PNTL, Unidade Espesiál Polísia (Companhia Delta), Unidade Patrullamentu Fronteira hosi Forsa Rezerva no membru F-FDTL ne’ebé destaka iha Tunubibi, halo intervensaun atu kontrola situasaun.

Maski ekipa konjunta konsege kontrola situasaun iha intervensaun dahuluk, depois sira sai hosi fatin, grupu rua ne’e kontinua halo asaltu malu. Tanba ne’e, ekipa konjunta fila fali ba fatin no konsege kontrola situasaun, kaptura joven ida no identifika membru F-FDTL ida ne’ebé envolve iha insidente ne’e.

Komandante informa katak kuaze tuku 20:00 kalan, joven no membru F-FDTL ne’e lori ba Komandu PNTL Munisípiu Bobonaro atu hala’o prosesu identifikasaun. Depois, Komandu PNTL kontaktu Komandu F-FDTL iha Tunubibi, no membru militar ne’e entrega ba nia komandu atu kontinua prosesu tuir prosedimentu instituisaun.

Lee Mós:
PM Xanana Agradese bá OMS Ne'ebe Ajuda Seitor Saúde TL

Enkuantu joven ne’ebé kaptura, kontinua hela iha sela detensaun Komandu PNTL Munisípiu Bobonaro atu enfrenta prosesu tuir lei.

Komandante mós informa katak joven balu ne’ebé envolve iha insidente ne’e iha ligasaun ho arte marsiais. Maibé, bainhira forsa seguransa to’o iha fatin, joven balu halai. Tanba ne’e, investigasaun sei kontinua atu identifika grupu hotu ne’ebé envolve iha kazu ne’e.

“Kazu ne’ebé akontese iha kalan ne’e, ekipa konjunta konsege kaptura ema na’in rua, ida membru F-FDTL no ida joven. Joven sira ne’e iha ligasaun ho arte marsiais. Maibé, bainhira forsa seguransa to’o iha fatin, joven sira balu halai. Kazu ne’e sei kontinua prosesu investigasaun atu identifika grupu sira ne’ebé envolve”, dehan Komandante PNTL Munisípiu Bobonaro.

Komandante konfirma katak insidente ne’e la kauza ema ida kanek, no situasaun seguransa iha área Memo normaliza fila fali. Komunidade, inklui inan-aman, labarik no joven sira, kontinua hala’o atividade sunu lilin no tau ai-funan iha rate matebian.

Lee Mós:
Prezidénsia Repúblika Oferese Uma Mahon ida ba Oan Kiak Nain Ha’at iha Suku Lourba-Bobonaro

Iha parte seluk, durante Selebrasaun Finadu tinan 2026, Komandu PNTL Munisípiu Bobonaro asegura katak ekipa konjunta PNTL no F-FDTL kontinua hala’o patrullamentu atu garante seguransa no estabilidade iha munisípiu ne’e, inklui iha subdistritu ne’en.

Komandante afirma katak komunidade sira partisipa ho entuziasmu iha komemorasaun ne’e, no situasaun jerál iha Munisípiu Bobonaro lao ho hakmatek, lahó insidente ka asidente grave.

Maski nune’e, durante períodu Selebrasaun Loron Finadu, Komandu PNTL Munisípiu Bobonaro rejista kazu asidente ida iha área Sasa no insidente konflitu ida iha Memo.

Lee nain: 1