Smnewstl.com | Baucau, 04 Novembru 2026- Polísia Nasionál Timor-Leste (PNTL) Munisípiu Baucau kaptura ona suspeitu na’in-tolu, ne’ebé deskonfia envolve iha insidente asaltu malu no atake ba membru polísia iha Suku Baguia, Postu Administrativu Kelikai, Munisípiu Baucau iha Tersa feira ne’e.
Komandante PNTL Munisípiu Baucau, Superintendente Xefe Polísia João Sanches Pires,Haktuir Insidente ne’e mós rezulta kareta patrulla PNTL ida hetan estragu no membru polísia ida sofre kanek.
Komandante PNTL Munisípiu Baucau, relata katak akontesimentu ne’e akontese iha tempu meudia, bainhira sidadaun sira ne’ebé halo viajen husi munisípiu atu fila ba Dili no Baucau, hasoru situasaun ida ne’ebé grupu balun taka dalan no impede movimentu veíkulu sira.
Tuir Komandante Esplika katak bainhira membru PNTL sira to’o iha fatin atu intervém no hakalma situasaun, ema sira ne’e la kumpre ka la obedese ba polísia, maibé halo rezisténsia no ataka fila fali membru seguransa sira.
“ bainhira ema fila husi munisípiu atu fila fali ba Dili no ba mai Baucau, akontese kazu ida iha Suku Baguia, Postu Kelikai, ne’ebé sira trava ema iha dalan no tuku ema,To’o ikus polísia sira ba atu atua, no Polísia tenta hakalma situasaun, maibé sira ataka fila fali polísia,” Komandante PNTL Munisípiu Baucau João Sanches Pires relata.
Komandante ne’e afirma katak PNTL konsege kaptura ona suspeitu na’in-tolu, no agora dadaun sira detein iha sela detensaun PNTL Baucau atu kontinua prosesu tuir prosedimentu legál.
“Ita kaptura ona suspeitu na’in-tolu, agora dadaun detein iha sela Baucau atu bele prosesa sira,” nia afirma.
Komandante ne’e konfirma katak insidente ne’e rezulta membru PNTL ida sofre kanek no kareta patrulla PNTL ida hetan estragu durante akontesimentu.
“Sira mós tuda membru polísia ida no tuda mós kareta eskuadra nian ida, ne’ebé hetan estragu. Tanba ne’e mak ita tenke prosesa,” nia hatutan.
Kona-ba alegasaun katak xefe aldeia ida deskonfia envolve iha insidente ne’e, Komandante PNTL hatete katak polísia sei kontinua prosesu investigasaun no sei buka tuir ema seluk ne’ebé halai sai husi fatin atu responsabiliza sira tuir lei.
“Kazu ne’e mós envolve xefe aldeia ida, no sira seluk ne’ebé halai, ita sei buka hodi prosesa tuir lei ne’ebé iha,” João Sanches Pires afirma.
PNTL Munisípiu Baucau kontinua rekolla dadus no evidénsia sira atu klarifika kronolojia no responsabilidade husi parte sira ne’ebé envolve iha insidente ne’e, antes submete kazu ba autoridade judisiária kompetente tuir prosedimentu legál.
Komentariu