Smnews.com |Dili, 27 Outubru 2026 — Empreza nasionál Timor Gás & Petróleo, EP (TIMOR GAP), asina Akordu Sosa no Fa’an ho empreza Austrália Woodside Energy Ltd. atu sosa partisipasaun tomak Woodside nian iha kampu gás naturál Greater Sunrise, iha Tasi Timor, ho valór tranzasaun hamutuk US$200 millaun.
Tranzasaun ne’e, se remata ho aprovasaun governamentál no regulamentár sira ne’ebé presiza, sei fó oportunidade ba TIMOR GAP atu kaer 100% partisipasaun iha projetu Greater Sunrise.
Akordu ne’e inklui partisipasaun Woodside nian iha lisensa retensaun NT/RL2 no NT/RL4, no mós iha Kontratu Fahe Produsaun JPDA 03-19 no JPDA 03-20.
Tuir akordu ne’e, pagamentu dahuluk ho valór US$13,71 millaun sei selu bainhira tranzasaun remata. Pagamentu daruak, ho valór US$11,29 millaun, sei selu iha loron 30 nia laran hafoin Desizaun Finál Investimentu nian. Restante US$175 millaun sei selu iha loron 365 nia laran hafoin hahú karregamentu gás naturál likifeitu (LNG) dahuluk ba kliente.
Antes akordu ho Woodside ne’e, TIMOR GAP anúnsi ona akordu vinkulativu ho Osaka Gas Australia Pty Ltd. atu sosa partisipasaun 10% empreza ne’e nian iha Greater Sunrise, iha fulan-setembru 2026.
Prezidente no Diretór Ezekutivu TIMOR GAP, Rui Soares, afirma katak akordu foun ne’e sei hametin pozisaun Timor-Leste nian atu acelera dezenvolvimentu Greater Sunrise no avansa prosesu hili konseitu dezenvolvimentu Timor LNG, ho objetivu atu lori gás ba prosesamentu iha kosta-súl Timor-Leste.
Rui Soares mós subliña katak Greater Sunrise la’ós de’it projetu atu dezenvolve rekursu gás naturál, maibé oportunidade atu promove dezenvolvimentu industriál no enerjétiku, formasaun kompeténsia, kriasaun empregu, dezenvolvimentu empreza lokál no atividade ekonómika iha Timor-Leste.
Iha fulan-setembru, Timor-Leste no Austrália konkorda ona kona-ba instrumentu tékniku prinsipál tolu ba enkuadramentu jurídiku no regulatóriu projetu nian, inklui Kódigu Minerasaun Petrolífera, Kontratu Fahe Produsaun no Rejime Fiskál. Instrumentu hirak ne’e sei kontinua tuir prosesu aprovasaun ida-idak.
Governu Timor-Leste mós kontinua serbisu tékniku atu prepara infraestrutura ba dezenvolvimentu Greater Sunrise, inklui peskiza jeotéknika no levantamentu rota planeadu ba kadoras Greater Sunrise no Bayu-Undan to’o Natarbora.
Greater Sunrise kompostu husi kampu Sunrise no Troubadour, ne’ebé lokaliza besik 150 kilómetru iha sudeste Timor-Leste no 450 kilómetru iha norueste Darwin, Austrália.
Maski akordu sosa no fa’an ne’e asina ona, prosesu akizisaun partisipasaun Woodside nian seidauk kompletu, tanba depende ba aprovasaun governamentál, regulamentár no kumprimentu ba kondisaun sira seluk ne’ebé estabelese iha akordu.
Komentariu