Smnewstl.com | Dili, 21 Outubru 2026 – Ministériu Administrasaun Estatal (MAE) hala’o reuniaun ho autoridade administrasaun munisipál sira atu reviza no atualiza dadus iha Portál Munisipál, hodi garante katak informasaun kona-ba dezenvolvimentu iha territóriu nasionál disponivel ho loos, kompletu no atualizadu.

Reuniaun ne’e prezididu husi Ministru Administrasaun Estatal, Tomás do Rosário Cabral, no envolve autoridade administrasaun munisipál sira, inklui Prezidente Autoridade Administrativa Atauro no Prezidente Autoridade Rejiaun Administrativa Espesiál Oe-Cusse Ambeno (RAEOA).

Lee Mós:
PM Xanana Husu Estudante Timoroan Iha Xina Estuda Maka'as Hodi Dezenvolve TL
ADVERTISEMENT
SCROLL FILA BA NOTISIA


Iha enkontru ne’e, ekipa téknika aprezenta dadus no informasaun ne’ebé rejista ona iha Portál Munisipál, atu autoridade sira bele halo verifikasaun, identifika dadus ne’ebé presiza hadi’a no kontribui ba prosesu atualizasaun informasaun iha plataforma dijitál ne’e.

Portál Munisipál mak plataforma eletrónika sentralizadu ne’ebé halibur, rejista no jere informasaun kona-ba dezenvolvimentu iha munisípiu sira, RAEOA no Atauro. Informasaun sira ne’e inklui setór agrikultura, saúde, edukasaun, infraestrutura, Programa Nasionál Dezenvolvimentu Suku (PNDS), planeamentu no orsamentu.

Lee Mós:
Tivan Lda Kontinua Responsabiliza Husi Becon Mineral ba Peskiza Iha Viqueque no Baucau

Revizaun ne’e iha objetivu atu hadi’a kualidade dadus, hametin transparénsia iha jestaun informasaun públika no garante katak dadus ne’ebé autoridade sira hatama iha sistema ne’e reflete situasaun real iha territóriu.

Liuhusi plataforma ne’e, Governu Sentrál no autoridade munisipál sira bele asesu informasaun kona-ba progresu dezenvolvimentu, fasilita koordenasaun entre instituisaun sira no apoia prosesu foti desizaun bazeia ba dadus ne’ebé loos no atualizadu.

Lee Mós:
Konsellu Ministru Indika ME Sai Responsável ba Projety BEST

Reuniaun ne’e partisipa mós husi diretór-jeral administrasaun direta no indireta, Sekretáriu Ezekutivu PNDS, Diretór Ezekutivu FEDA interinu, reprezentante Rekursu Umanu (RH), UAD, UIT, diretór servisu munisipál sira husi setór agrikultura, saúde, edukasaun no PNDS, SECAM sira, no reprezentante planeamentu.

MAE kontinua hametin jestaun dadus administrativu no utilizasaun sistema dijitál iha administrasaun públika, hodi apoia planeamentu, koordenasaun no implementasaun programa dezenvolvimentu iha munisípiu sira.(Smnews/)

 

Lee nain: 28