Smnewstl.com || Lautém, 23 Outubru 2026 – Primeiru-Ministru Timor-Leste, Kay Rala Xanana Gusmão, loke ofisialmente Festival Fronteira 2026 iha Vila Kom, Munisípiu Lautém, hodi apela ba komunidade internasionál atu hametin dame, diálogu, rekonsiliasaun no kooperasaun entre nasaun no povu sira.
Iha diskursu, PM Xanana Gusmão afirma katak, maski festival ida-ne’e bele konsidera hanesan atividade ki’ik, maibé nia iha signifikadu boot ba mundu, liuliu atu promove komprensaun, dame no moris hamutuk entre povu husi nasaun diferente sira.
Xefi Governo esplika katak, iha mundu ne’ebé hasoru konflitu no instabilidade iha rejiaun oioin, inklui Mediu oriente no Ukraina, atividade kulturál no artístika hanesan Festival Fronteira bele sai meiu ida atu hato’o mensajen kona-ba nesesidade atu harii dame no komprensaun entre ema hotu.
“Maski atividade ida-ne’e ki’ik, maibé nia signifikadu boot tebes. Husi atividade ki’ik hanesan ne’e, ita bele hatudu ba mundu katak ita tenke moris hamutuk, komprende malu, halo koordenasaun no diálogu atu hametin kooperasaun entre nasaun no komunidade sira,” Xanana Gusmão afirma iha ninia diskursu.
Alémde ne’e, Primeiru-Ministru mós subliña katak, relasaun entre povu sira la tenke limita de’it ba interese polítiku ka ekonómiku, maibé tenke bazeia mós ba sentimentu umanidade, solidariedade no respeitu ba malu.
PM Xanana simu ho apresiasaun partisipante sira ne’ebé mai husi rai seluk, no hateten katak sira-nia prezensa iha Timor-Leste la’ós de’it hanesan turista, maibé hanesan maun-alin ne’ebé mai atu hametin amizade no relasaun entre povu sira.
PM Xanana Gusmão mós hato’o ninia hanoin kona-ba orden internasionál, no enfatiza katak ,mundu presiza sistema ida ne’ebé fó importánsia ba interese no direitu nasaun hotu-hotu, la’ós de’it nasaun boot no forte sira.
PM Xanana dehan, atividade hanesan Festival Fronteira bele sai plataforma ida atu haruka mensajen ba mundu katak nasaun hotu, inklui nasaun sira ne’ebé sei dezenvolve hela, iha papél importante atu promove dame, diálogu, rekonsiliasaun no kooperasaun.
Xefi Governo hato’o mós ninia sentimentu onra, tanba hetan oportunidade atu loke ofisialmente atividade ne’e iha Vila Kom, Munisípiu Lautém.
Festival Fronteira 2026, liuhusi atividade kulturál no enkontru entre komunidade sira, iha objetivu atu hametin amizade, promove komprensaun entre povu sira no hato’o mensajen dame ba mundu.(Smnews/)
Komentariu