Smnewstl.com|DiLi, 19 Outubru 2026 — Lori bandeira Timor-Leste ba palku internasionál sai esperiénsia ne’ebé sei hela iha memória Celia Bosco. Maski la konsege tama iha Top 25, nia fila fali mai rai ho kontente, esperiénsia foun no orgullu tanba hetan oportunidade atu lori Timor-Leste nia naran ba kompetisaun Miss Global 2026, ne’ebé hala’o iha Tailándia.
Ba Celia, kompetisaun ne’e la’ós de’it kona-ba beleza ka oportunidade atu manán títulu, maibé mós dalan ida atu aprende, dezenvolve kapasidade an rasik no hatudu ba mundu katak feto timoroan sira iha talentu no kapasidade atu reprezenta sira-nia nasaun iha nivel internasionál.
Hafoin to’o iha Aeroportu Internasionál Nicolau Lobato, Comoro, Dili, iha loron 19 Outubru 2026, Celia fahe nia sentimentu kontente ba jornalista sira, tanba ida-ne’e mak primeira vez nia partisipa iha kompetisaun Miss Global.
“Hau sente kontente tebes tanba ida-ne’e mak primeira vez hau partisipa iha kompetisaun Miss Global. Hau koko ona atu halo buat ne’ebé bele tuir hau-nia kapasidade no fó esforsu máximu iha eventu ne’e, maski kandidata sira seluk iha kapasidade no potensial ne’ebé aas,” dehan Celia.
Iha kompetisaun ne’ebé envolve kandidata hamutuk 72 husi nasaun oioin, Celia hetan oportunidade atu hasoru feto husi kultura no ambiente diferente. Enkontru hirak-ne’e sai oportunidade atu aprende ba malu, fahe esperiénsia no komprende diversidade kultura iha mundu internasionál.
Maski la konsege avansa ba etapa Top 25 to’o Top 5, Celia la haree rezultadu ne’e hanesan obstákulu ba nia mehi. Nia konsidera katak valor boot liu mak oportunidade atu lori Timor-Leste nia naran ba mundu no promove identidade nasionál.
“Maski hau la konsege tama iha Top 25 to’o Top 5, hau sente kontente tanba bele lori Timor-Leste nia naran ba mundu internasionál, atu ema husi nasaun seluk bele koñese Timor-Leste no nia kultura,” nia afirma.
Kultura Timor-Leste sai ponte ba mundu.
Durante kompetisaun, Celia hetan oportunidade atu promove kultura tradisionál no identidade Timor-Leste nian. Nia konta katak ema barak husu kona-ba Timor-Leste, tanba nasaun ki’ik iha Sudeste Aziátiku ne’e seidauk barak marka prezensa iha kompetisaun internasionál hanesan Miss Global.
Situasaun ne’e sai oportunidade ba Celia atu fahe koñesimentu kona-ba nia rai, kultura no identidade nasionál ba partisipante husi nasaun seluk. Ba nia, reprezenta Timor-Leste signifika lori responsabilidade atu hatudu imajen pozitivu kona-ba nasaun no nia povu.
Nia mós sente katak esperiénsia ne’ebé hetan husi kandidata seluk, ne’ebé iha koñesimentu no esperiénsia barak kona-ba kompetisaun hanesan ne’e, ajuda nia atu aprende buat foun no dezenvolve kapasidade an rasik.
Maibé, dalan ba palanku internasionál la’ós sempre fasil. Celia konta katak kandidata sira hasoru atividade intensa, ho tempu deskansu ne’ebé limitadu, hahu husi dadeer to’o lokraik. Iha kandidata balu ne’ebé mós moras tanba atividade sira ne’ebé kleur no intensa.
Esperiénsia ne’e halo Celia haree katak preparasaun ba kompetisaun internasionál presiza planeamentu ne’ebé di’ak, treinamentu sistemátiku no preparasaun fízika no mentál ne’ebé adekuadu.
Mehi ida atu loke dalan ba feto joven sira.
Liu husi esperiénsia ne’ebé hetan, Celia hakarak sai inspirasaun ba feto joven Timor-Leste sira ne’ebé iha mehi atu reprezenta sira-nia nasaun iha kompetisaun internasionál.
Nia husu ba feto joven sira atu la tauk buka oportunidade, hatudu sira-nia talentu no fiar ba kapasidade an rasik. Ba Celia, oportunidade ida ne’e bele sai hahú ba aprendizajen no dezenvolvimentu pesoál, maski rezultadu ikus la tuir espetativa.
Nia nia objetivu la’ós de’it atu reprezenta Timor-Leste iha Miss Global 2026, maibé mós atu kontribui ba kriasaun oportunidade ba feto timoroan sira seluk ne’ebé hakarak tuir dalan hanesan iha futuru.
Iha parte seluk, Diretora Miss Global Timor-Leste 2026, Elisabeth Gusmão Oliveira, esplika katak organizasaun fó apoiu ba Celia liuhusi preparasaun, mentoria, treinamentu no nesesidade sira seluk atu nia bele partisipa iha kompetisaun internasionál ne’e.
Elisabeth hateten katak preparasaun ne’e envolve apoiu husi instituisaun governu nian, inklui Ministériu Juventude, Desportu, Arte no Kultura no Sekretaria Estadu Arte no Kultura. Orsamentu ba nesesidade sira, inklui viajen no konferénsia imprensa, hamutuk besik US$ 10.000.
Maski nune’e, Elisabeth admite katak preparasaun ba kompetisaun tinan ida-ne’e seidauk máximu tanba tempu preparasaun ne’ebé limitadu. Tanba ne’e, organizasaun sei halo avaliasaun no hametin estrutura organizasionál atu prepara kandidata sira ho di’ak liután ba kompetisaun tuirmai.
Organizasaun mós planeia loke rejistu ba feto timoroan sira ne’ebé hakarak partisipa iha prosesu selesaun ba reprezentante Timor-Leste iha kompetisaun internasionál iha tinan oin.
Liu husi prosesu selesaun ne’e, feto joven sira sei hetan oportunidade atu hatudu sira-nia talentu, kapasidade no konfiansa an rasik, hodi hili kandidata ne’ebé apropriadu atu lori bandeira Timor-Leste ba palanku internasionál.
Ba Celia Bosco, fila mai rai la signifika remata dalan, maibé lori fila mai esperiénsia ne’ebé bele sai hanesan lisaun ba futuru. Nia esperiénsia iha Miss Global 2026 hatudu katak orgullu nasionál la depende de’it ba títulu ka pozisaun ne’ebé hetan, maibé mós ba esforsu atu reprezenta rai no promove kultura ba mundu.
Maski la lori fila mai títulu manán nian, Celia lori fila mai esperiénsia, aprendizajen no mehi atu haree feto timoroan sira hetan oportunidade boot liután iha palanku internasionál.(Smnews/)
Komentariu