Zacarias Albano da Costa, re-eleitu Nu’udar Sekretáriu Ezekutivu CPLP bá Periódu 2023-2025.

Smnewstl.com – Desizaun ne’e foti liu husi Konferénsia Xefe Estadu no Xefe Estadu no Governu CPLP bá dala XIV ne’ebé hala’o iha São Tomé e Príncipe, ne’ebé antes ne’e hetan ona aprovasaun husi reuniaun Konsellu Ministru CPLP bá dala XXVIII, ne’ebé hala’o iha loron 25 fulan Agostu 2023.

Emviadu espesial Prezidente Repúblika atual Prezidente Parlamentu Nasionál, Maria Fernanda Lay informa, Xefe Estadu no Governu sira halo rekondusaun bá mandatu Sekretáriu Ezekutivu CPLP, Zacarias Albano da Costa, bá periódu tinan rua 2023-2025, tanba rekoñese esforsu ne’ebé nia halo durante iha mandatu dahuluk.

“Ohin ne’e eleitu ona no ofisializadu. Klaru ke ne’e onra ida bá Timor-Leste, tanba Paízes membrus CPLP rekoñese esforsu ho traballu boot husi Señór Doutor Zacarias Albano da Costa, ida-ne’e mak ita apoia rekondusaun hanesan Sekretáriu Ezekutivu bá prósimu anos,” hateten Prezidente, Fernanda Lay.

Iha sorin seluk, Sekretáriu Ezekutivu CPLP, Zacarias Albano da Costa hateten, sente onradu tebes, tanba nafatin hetan fi’ar husi estadu membru CPLP no mós Timor-Leste ne’ebé kontinua depozita konfiansa bá nia hodi lidera organizasaun ne’e bá tinan rua tan.

“Ha’u sente onradu tebes, ohin bele hetan tan fali eleisaun bá rekondusaun nu’udar Sekretáriu Ezekutivu to’o simeira ne’ebé sei hala’o iha Guiné Bissau iha 2025-2027,” hateten Zacarias.

Zacarias Albano akresenta, objetivu prinsipál bá oin mak Prezidénsia São Tomense bá CPLP, tanba São Tomé e Príncipe mak lidera CPLP durante tinan rua ne’ebé mai ho lema katak, “Juventude sustentabilidade”.

“Tema ida importante teb-tebes, tanba ha’u hanoin barak halo, ita dehan bebeik, juventude mak futuru, mais iha CPLP nia laran joven sira tenki haree kedas oinsá mak CPLP haree bá sira-nia problemas, sira-nia aspirasoens, sira-nia mehi, espasu bá sira bele iha atu partisipa iha setores hotu-hotu iha edukasaun, iha negósius, iha polítika, nível sosiál no ekonómiku, ha’u hanoin ne’e mak objetivu prinsipál,” subriña tan.

Alende ne’e, Xefe Estadu no Governu CPLP sira mós halo, aprovasaun bá deklarasaun final São Tomé, rekondusaun bá mandatu nu’udar Sekretáriu Ezekutivu.

Aprovasaun kandidatura Paraguai nian bá observador assosiadu nu’udar observadór assosiadu númeru 33 bá CPLP, tanba dadaun ne’e iha ona membrus assosiadus 33, iha ne’ebé hamutuk nasaun 29 no mós organizasaun internasional 4.

Iha okaziaun ne’e, Prezidente Repúblika Angola, João Lourenço, ofisiamente entre Prezidénsia Rotativa CPLP Protémpore bá Prezidente Repúblika São Tomé e Príncipe, Carlos Vila Nova, tanba São Tomé mak sei lidera CPLP bá tinan rua 2023-2025.

Entretantu, delegasaun husi Timor-Leste ne’ebé partisipa iha simeira Xefe Estadu no Governu CPLP bá dala XIV ne’e, Ministru Negósiu Estranjeiru no Kooperasaun (MNEK), Bendito dos Santos Freitas, Xefe Missaun Permanente Junta CPLP, Embaixadora Marina Ribeiro Alkatiri no seluk tan. (Smnews)