Xina Sei Apoiu F-FDTL Harii Ospitál Militár Iha Metinaro

Smnewstl.com 23-11-2021 (Dili) – Xefe Estadu Maiór Jenerál Falintil Forsa Defeza Timor-Leste (F-FDTL), Tenente Jenerál Lere Anan Timur deklara, governu Xina reafirma ona protidaun atu instala ospitál militár bá F-FDTL iha Metinaro nune’e fasilita asistensia ba forcas sira.

Lere konsidera, bainhira Ospitál refere instala ona sei fasilita tratamentu espesiál bá membru F-FDTL inklui veteranus, polísia no mós ema kbiit la’ek no vulnerável sira.

“Ida-ne’e iha ona, maibé Xina mak fó apoiu, ha’u ko’alia ho Embaixadór no Adidu sira iha tinan kotuk e sira prontu atu harii ospitál militár bá ita,” dehan Lere Anan Timur, iha Kuartel Polísia Militár Kintal Boot, Dili, Tersa-feira ne’e.

Nia hatutan, fatin ne’ebe indika ona maka iha Metinaro maske antes ne’e propoin Ospital eis ospitál Lahane atuál sala izolamentu Covid-19 nian, no parte governo mak Xina lakoi tanba konsidera obra husi governu Portugál desde kedas tempu Portugés.

“Ami hatudu Lahane, sira lakoi, tanba obra Portugés sira-nian, ami hakarak halo foun, ne’e mak ha’u hatudu fali Metinaro hanesan ospitál militár la’ós bá militár de’it, bá veteranu bá polísia bá sira-ne’ebé laiha kbiit atu bá ospitál sira seluk,” tenik nia.

Sorin seluk, Xefe Saúde Militár, Tenente Koronel Guido de Oliveira hateten, 90% F-FDTL iha ona ekipamentu saúde, tan ne’e, bá futuru F-FDTL mak sei halo check-up rasik bá nia membru sira, maibé, nafatin husu apoiu bá espesialísta sira iha HNGV inklui parseiru ONG sira.

“Ekipamentu ita bele hatete tanba fatin ne’ebé agora dadauk la’o hela, maibé ami bele hatete katak, 90% F-FDTL iha ona ekipamentu, tinan seluk ita rasik mak bele halo, ita husu apoiu nafatin espesialista sira husi HNGV no parseiru ONG sira,” dehan Koronel Guido.(ant)