Xina Entrega Fatin ‘Sulan’ Kriminozu ba Komandu PNTL Dili

Smnewstl.com 17-12-21 (Dili) — Embaixador Xína iha Timor-Leste, Xiao Jianguo’s entrega ona sela sela detensaun bá Polísia Nasionál Timor-Leste (PNTL) ne’ebé konstroe iha Komandu Polísia Munisípiu Dili.

Iha Sesta-feira ne’e, Embaixadór Xína iha Timor-Leste, Xiao Jianguo’s, Vise-Ministru Interiór, António Armindo, Komandante Jerál PNTL, Komisáriu Faustino da no mós Komandante Polísia Munisípiu Dili, Superintendente Xefe Henrique da Costa inaugura sela detensaun iha Komandu Polísia Munisípiu Dili, ne’ebé konstroe husi Embaixada Xína.

Diplomata Xína iha Timor-Leste, Xiao Jianguo’s sente onradu hodi konstrui ona sela detensaun bá PNTL Munisípiu Dili, nune’e bele fó apoiu bá Polísia hodi hala’o servisu di’ak liután hodi fó seguransa bá sidadaun sira.

“Iha tempu hira liu bá, kontinua, tanba sá ohin ami iha ne’e hakarak ajuda PNTL atu harii sela detensaun liu-liu iha estasaun Polísia Munisípiu Dili nian, ha’u espera liu husi kooperasaun mútua entre Embaixada Xína ho PNTL, sei kontinua liután atu konklui iha futuru,” dehan Embaixadór Xína, Xiao Jianguo’s, iha Komandu PNTL Munisípiu Dili, sesta ne’e.

Vise Ministru Interiór, António Armindo lori governu Timor-Leste nia naran, agradese bá governu Xína liu husi Embaixada Xína iha Timor, tanba bele simu pedidu husi governu Timor-Leste nian hodi ajuda PNTL harii gratuitamente sela detensaun foun ida bá Polísia.

“Ita-nia sentru detensaun ne’e apoiu husi governu Xína liu husi Embaixada Xína, tanba haree bá kondisaun ida-ne’ebé durante ne’e ladún di’ak atu detein ita-nia sidadaun sira iha ne’e,” dehan Vise MI, António Armindo.

António Armindo informa, governu iha vontade no planu atu dezenvolve PNTL, maibé ezekutivu labele halo buat hotu, tanba atu dezenvolve presiza orsamentu.

“Purtantu balun ita prevé, balun ita husu apoiu husu apoiu ita-nia doadores sira komplementa malu, ida-ne’e mak funsaun husi ita-nia parseiru dezenvolvimentu ho doadores sira, ida-ne’ebé mak ita la halo ita husu ajuda bá ita-nia parseiru dezenvolvimentu komplementa ita,” dehan nia.

Nune’e mós, Komandante PNTL, Komisáriu Faustino da Costa reforsa, sela detensaun nu’udar fatin atu asegura ema ho seguru, bainhira sira komete krime ruma.

Faustino haktuir, dadauk ne’ebé, PNTL halo hela revizaun bá norma Polísia nian, tanba norma refere utiliza desde tempu tranzisaun administrasaun Nasoens Unidas bá governu Timor-Leste kona-ba regra utilizasaun sela detensaun sira.

Tan ne’e, nia husu Komandu PNTL Munisípiu Dili, atu utiliza sela detensaun foun ne’e ho kuidadu no mós responsabilidade, nune’e bele dura bá tempu naruk.

“Uza ho kuidadu, uza ho responsabilidade, hatene katak, fatin ne’e la’ós PNTL mak atu utiliza, maibé ne’e bá públiku mak sei utiliza, entaun oinsá PNTL bele asegura fatin ne’e ho di’ak par ita bele asegura bá tempu naruk, agradese tanba bele hetan apoiu ida-ne’e,” dehan Faustino.

Komandante Jerál ne’e fi’ar katak, bá futuru governu Xína sei fó apoiu bá PNTL hodi harii sela detensaun iha Komandu PNTL Munisípiu sira.

Entretantu, sela detensaun ne’e, konstroe husi tékniku enjiñeru husi Xína rasik, inklui timoroan balun, hahú iha fulan Outubru liu bá no finaliza iha Dezembru tinan 2021, enkuantu sela refere hamutuk kuartu 4 ne’ebé sei akumula ema hamutuk na’in 200 resin.(ant)