Xefe Estadu Tulun Família Difisiénsia Na’in Tolu Iha Uatolari

Smnewstl.com Vikeke, 23 Fevereiru 2023.Prezidente Repúblika, José Ramos-Horta, Kinta-Feira ne’e, fó apoiu umanitáriu bá inan-faluk ho nia oan na’in tolu ne’ebé sofre difisiénsia fízika no mental.

Hafoin Xefe Estadu hare iha média sosiál iha fulan balun liu bá, Prezidente Repúblika orienta ekipa Assesoria Apoiu Sosiedade Sivíl no Servisu Sosiál, hodi hakat diretamente ba rezidénsia portadór difisiénsia na’in tolu iha Suku Makadiki, Postu-Administrativu Uatolari, Munisípiu Viqueque

“Xefe Estadu iha fulan ida liu ba, haré iha media sosiál, nune’e haruka ami mai observa kondisaun moris família ida ne’e nian no lori mos apoiu humanitáriu balun husi Prezidente Horta. La promete, maibé sei relata ba Prezidente Repúblika no ba oin, apoia saida mak bele halo-tan ba família liu-liu, maun-alin ema ho difisiénsia na’in tolu ne’e,’’ Tenik Assesór ba Assuntu Sosiedade Sivíl no apoiu Sosiál, Quintiliano Moníz Carvalho.

Luis Ximenes, reprezenta família difisiénsia, agradese ba Prezidente Repúblika ne’ebé tulun ona família ne’e.

‘’Obrigadu barak ba Prezidente Repúblika ne’ebé mai to’o kedas fatin ne’e, liu husi ekipa ne’ebé mai lori mos ajudu ruma, ami fó obrigadu. Loron-loron, nia Ama mak tein ba na’in tolu ne’e, se lae nia bin sira mak tein. Ami iha na’in 8, feto tolu ne’ebé forma ona família, mane na’in 4, ha’u nia kondisaun mak di’ák, na’in tolu seluk difisiénsia. Hanesan maun bo’ot ha’u forsa la to’o atu halo uma ba sira. Husu atu se bele halo uma ba sira na’in tolu,’’ Dehan Luis Ximenes nu’udár maun-bo’ot ne’ebé forma ona família.

Além ida ne’e, Luis Ximenes mos husu ba Prezidénsia Repúblika atu ajuda mákina dulas nú, nune’e hafasil nia atu buka osan, nune’e bele hare ba nia família no nia alin na’in tolu.

Iha tinan 1995, Luis ne’ebé famozu ho talentu futeból iha Postu-Administrativu Uatolari, lori nia klube  kompete iha nível munisípiu iha Dili no kontinua ba Indonézia, maibé labele kontinua talentu ne’e tambá hare ba nia alin-na’in tolu ne’ebé moris  ho kondisaun difisiénsia.

Maun-alin ho difisiénsia fízika no mental mak hanesan Bernandino da Silva, Clementino Pinto, Cipriano Pinto ho idade liu ona 25 no durante ne’e nia inan Rofina Monteiro ho idade 70 resin mak tau-matan ba na’in tolu, ho nia maun bo’ot Luís Ximenes ne’ebé buka hela servisu iha vila.

Entretantu, ajudu ne’ebé Prezidente Repúblika oferese, hanesan ai-han, sasan toba no apoiu seluk ne’ebé oferese rasik husi Xefe Estadu, José Ramos-Horta.

 (REMATA)