Xefe Estadu Ho MNEK Singapura Diskuti Futuru Projetu Kooperasaun

Smnewstl.com, Dili — Ministru Negósiu Estranjeiru Singapura, Vivian Balahkrisnan, hala’o enkontru bilateral ho Prezidente Repúblika, José Ramos-Horta, hodi diskuti kona-ba prioridade ne’ebe nasaun rua sei koopera iha futuru.

“Ami halo diskusaun no konversa ida klean kona-ba asuntu lubuk ida ne’ebé Timor Leste no Singapura sei explora hamutuk iha futuru. Ha’u previléjiu no sente onradu iha ne’e, no ha’u hanoin katak oportunidade ida-ne’e, hanesan tempu ne’ebé kapás atu servisu hamutuk ba povu Timor-Leste,” hateten Ministru MNEK Singapura, Vivian Balahkrisnan, iha Palásiu Prezidensiál.

Xefe diplomasia Singapura ne’e hatutan, Timor-Leste hetan ona estatutu nu’udar observadór permanente iha organizasaun rejionál ASEAN.

“Timor Leste hanesan observadór permanente ba organizasaun rejionál ASEAN nian no Xefe Estadu haree daudaun ba tinan 50 oin mai, ba prosesu dezenvolvimentu tuir mai ba Timor Leste,” katak Vivian Balahkrisnan.

Ministru Vivian Balahkrisnan konsidera, vizita servisu mai Timor-Leste ne’e hanesan previléjiu Timor hodi hasoru malu ho Xefe Estadu, José Ramos-Horta, ne’ebé hanesan mós belun di’ak bá Singapura.

Tanba tuir Vivian katak, Prezidente Ramos-Horta mak sempre apoia programa lubuk ida bá Singapura hanesan iha área maternidade liu-liu bá inan isin-rua no labarik sira.