Xanana: Taxa Avo Nana Tenki Organiza Tinan-Tinan

Smnewstl.com Laclo, 12 Marsu 2023.Líder Nasionál Kay Rala Xanana kongratula ekipa Organizador Taxa Avo Nana ba Modalidade Futeból Salaun, iha Postu Administrativu Laclo, Munisípiu Manatutu, tanba konsiensializa joven sira, hodi sai autor ba paz.

“Obrigadu ba imi, organiza buat sira ne’e di’ak teb-tebes, halo ida ne’e, bele halo ita-nia joven sira hako’ak malu, konese malu, ko’alia ba malu, hodi sente katak, hotu-hotu bele sai autor ba paz, domin no damen iha ita nia rain,” Afirma Kay Rala Xanana Gusmão.

Tuir Xanana, disportu bele hametin amizade no espiritu kamaradajen husi joven sira, hodi tane a’as valor husi desportu “lakon ka mana’an la’os problma, imi hatudu imi nia kbi’it”.

Tanba ne’e, Kay Rala Xanana Gusmão hakarak halo selesaun ba jogadór di’ak iha nível lokál, hodi kompete iha munisípiu to’o nasionál.

“Tenki tinan-tinan organiza ida ne’e,  la’os ita taru osan mana’an agora, ou lakon agora, osan la iha ona atu taru, la’e! disportu la’os hanesan ne’e, ajuda imi nia saude,  ajuda entre imi nia kamaradajen, amigo di’ak, amigo di’ak no respeita  ekipa ida lakon ka mana’an, ne’e mak disportu nia di’ak, tanba imi hatudu imi nia talentu, loron seluk fali ita ko’alia kompetisaun, selesaun Laklo, hasoru  Selesaun Laklubar, selesaun Laleia hasoru selesaun Soibada,” Fundamenta Xanana.

Lider Nasional ne’e garante katak, kompetisaun iha nível lokál to’o munisipal, bele hamosu estrela jogador ne’ebé bele projeta ba kompetisaun nasional no internasional.

Ba Xanana, realizasaun eventu iha nível postu, bele hakbi’it kapasidade organizadór, hodi bele jere, kompetisaun sira iha nível municipal.

“Atu buat ne’e la’o dadauk, atu fo tan kbiit no konfiansa katak , ami  mos bele, ami mos hatene, ami mos iha. Para bele mos to’o tempu ida, Munisípiu mak kaer  buat hotu iha munisipiu laran,  disportu  mos iha ona, iha ona labarik sira,  iha ona sé mak organiza. juventude desportu, ba karik to’o Baucau,  komesa iha ona hanoin, prepara-an  husi suku, husi eskola, husi postu, hamosu Bintang (estrela),” Dezafia Xanana.

Kompetisaun futebool salaun ne’ebé hahu iha fulan Fevereiru to’o Marsu tinan ne’e, partisipa husi Klubu hamutuk 19 husi Postu Administrativu Laclo, Munisipiu Manatutu.

Hafoin enserra kompetisaun Taxa Avo Nana, Labarik sira husi Eskola Sekundária Katólika Saun João Paulo II Laclo ne’ebé espasu la sufisiente, hodi estudante sira okupa uma antigun ida ne’ebé la iha kondisaun atu garante prosesu aprendisajen.(smnews)