Xanana Simu Afiliasaun Eis Tezoreira KHUNTU No Militante Importante FRETILIN No PLP

­Smnnewstl.Com-Ainaro, 26 Fevereiru 2023- Membru kargu importante sira hosi Partidu KHUNTU, FRETILIN no PLP deklara afilia ba Partidu CNRT hodi manan iha eleisaun Parlamentár loron 21 Maiu 2023.

Afiliante partidu politikus tolu ne’e halo deklarasaun afiliasaun kompostu hosi Eis Tezoreira Partidu KHUNTU, Maria Soi ho nia kaben, Agostinho Afonso nu’udar Eis Xefe Gabinete Ministra Solidaridade Sosiál (MSS), Armanda Berta. Enkuandu hosi partidu PLP no FRETILIN nu’udar membru estutura partidu rua hosi Munisipiu Ainaro nian.

Afiliasaun sira ne’e hala’o iha konsolisasaun regionál Partidu CNRT Kompostu, Aileu, Ainaro, Manufahi no Covalima ne’ebé hala’o iha salaun salaun Parokia Vila-Maria, Ainaro.

Prezidente Partidu CNRT, Kay Rala Xanana Gusmão hamutuk ho Sekretariu Jerál, Fransisco Kalbuadi Lay, Vice Prezidente Partidu, Gil da Costa “Oan Soru” hodi rona sira nia deklarasaun afiliasaun inklui entrega hikas atributu partidu nian no simu fila fali kamiza no bandeira CNRT ne’ebé fó hatais no entrega direita hosi Xanana.

Eis Tezoreira Partidu KHUNTU, Maria Soi deklara nia sai hosi KHUNTU, tanba partidu ne’e la hatudu transparansia iha jestaun administrasaun finansas ba membru sira.

“Ha’u nu’udar tezoreira partidu KHUNTU hosi tinan 2011 too Fevereiru 2023 foin lalais ne’e mak ha’u rezigna aan, ha’u finanas iha bankada KHUNTU kontinua sai mós vice sekretaria KHUNTU ba Parlametu Nasionál. Ha’u ho ha’u nia kaben (Agostinho Afonso) ami rua afilia ona mai CNRT hodi mai apoia ba Avó Nana hodi fó fiar fila fali lidera ita nia nasaun, hodi ukun ho di’ak no hadia nasaun ne’e,” dehan Maria.

Hafoin sai hosi KHUNTU, Maria ho nia kaben hetan ameasa hosi membru lider partidu KHUNTU balun, maibé Maria Soi la tauk hodi alerta ba nia familia no maluk sira atu labele tauk sai hosi KHUNTU apoia no vota CNRT.

“Ha’u husu ba militante no simpatizante hosi CNRT nian. Ita hotu akompaña nota deklarasaun karta ida ne’ebé fó sai mesiona ha’u nia naran, ne’e refleita duni tuir lalauk partidu KHUNTU nian la’o hanesan ne’e duni. Atan ha’u ho hau nia kaben agora dadaun atu aprezenta mós ha’u nia lista membru ne’ebé halo juramentu hamutuk ema 500. Agora ami nain rua mobiliza hela sira hosi fatin ba fatin hodi fó fiar ba partidu CNRT no fó fiar ba Avo Nana atu ukun rai ida ne’e ho di’ak,” nia deklara.

Iha fatin hanesan, Eis Xefe Gabinete Ministra Armanda Berta hosi Partidu KHUNTU, Agostinho Afonso deklara sai hosi KHUNTU hodi apoia CNRT bele manan hodi hadia problema nasaun.

Agostinho promote sei servisu hamutuk ho CNRT hodi fó votus ba CNRT iha eleisaun parlamentar loron 21 de Maiu 2023.

“Iha loron 21 Maiu agora ita nia kabina votus sei barrulhu, viva CNRT, Viva maun boot Xanana no viva feto Timor no viva Timor-Leste,” nia hatete.

Nia rekoñese partidu KHUNTU lideradu, Naimori Bucar ho nia kaben Armanda Berta kaer hamosu problema oin-oin iha partidu laran.

“Ha’u mak rezignaan, tanba sistema ladun di’ak, e estrutura KHUNTU rasik mós hatene, ami na’in rua nia problema. Iha Bobonaro no Zumalai ami la’o hela atu lori fila membru sei mai hotu iha CNRT,” nia hatete.

Iha fatin hanesan, Reprentante FRETILIN Suku Manutasi, Domingos da Conceição deklara hosik hela FRETILIN hodi apoia CNRT atu hadia rai ne’e, tanba Xanana hatene hakuak no hadomi povu.

“Ha’u mai iha ne’e, tanba Maun Xanana hatene hadomi ema, hadomi povu, tuir Maromak nia hanorin, no maun nu’udar ema ne’ebé iha komptensia atu hasai povu hosi nakukun hodi ita moris haksolok,” nia afirma.

Parte seluk, Koordenador Suku PLP Manutasi, Reinado de Araùjo consider CNRT maka partidu ida loos no iha prinisipiu atu haree no hadia interese nasionál povu nian hodi halo dezenvolvimentu.

“Ha’u mai tanba ha’u haree CNRT hamarik ho istoria, tanba istoria CNRT hahú hosi funu too hakotu funu. Atu luta hamutuk ho CNRT luta vitoria iha eleisaun mai agora hodi Maun Xanana sai primeiru ministru hadia rai Timor,” nia hatete.

Entretantu, Membru FRETILIN Suku Mulo, Postu Hatublico, Elena Fatima “Harohan Laran Susar” deklara nia fila fali hamutuk ho CNRT, tanba uluk funu la’o terus no moris hamutuk ho Xanana nu’udar Komandante Em- Xefe-das FALINTIL.

Nia husu ba Xanana bainhira kaer ukun labele haluha tau matan ba veteranu/a sira nia oan atu hetan bolsu estudu eskola iha universidade rai laran no estranejerus.

Xanana Agradese

Entretantu, Prezidente Partidu CNRT, Xanana Gusmão hato’o ba membru partidu FRETILIN, KHUNTU no PLP.

Xanana klarifika, CNRT agradese, tanba membru militante partidu hirak ne’e apoia CNRT, tanba sira hatene hili no fihir CNRT nu’udar partidu boot iha vizaun no misaun atu hadia nasaun.

“Ho maluk sira mai dadaun ne’e no iha fatin hotu- hotu hatudu katak, CNRT partidu ida ne’ebé bele tane aas, erois no martires sira nia mehi. Tanba ne’e bainhira imi vota ba CNRT, tanba CNRT iha vizaun no mehi boot atu hadia povu no nasaun nia vida,” dehan Xanana.

Entretantu, Vice Prezidente Partidu CNRT, Gil da Costa “Oan Soru” hato’o dehan iha eleisaun prezidensiál Dr. José Ramos-Horta hetan votus rihun 25. Nune’e iha eleisaun parlamentar 2023, votus ne’e sei mantein no aumentan.

 “Agradese no benvindo ba ita boot sira hotu hodi ita hamutuk la’o ba oin, tanba uluk ita hamutuk deklara lori Dr. José Ramos-Horta ba prezidente. Ohin mai hamutuk ho Maun Xanana ba Primeiru Ministru atu hadia problema nasaun. Tanba ne’e iha eleisaun prezidensiál, Ainaro fó votus rihun 25 no ita mantein nafatin votus,” nia hatete.

Nia dehan, membru iha Ainaro ema tara partidu politiku barak, maibé iha rezultadu votuasaun maka sei barullu.

Nia dehan, ohin loron lider mundiál barak, inklui reprezentante banku internasional sempre hasoru Xanana hodi deskute oinsa maka bele halo planu no politika rekooperasaun ekonomia.

Entretnatu, Sekretairu Jerál Partidu CNRT, Fransisco Kalbuadi Lay dehan konsolidasaun nasionál partidu CNRT remata ona. Nune’e ba oin CNRT sei foka programa hodi hasoru eleisaun parlamentár.

“Servisu sei todan, tanba konta fulan rua deit hahú ita sei servisu makas atu manan iha eleisaun mai ne’e,” dehan Kalbuadi.

CNRT sei kontinua servisu ho movimentu molitiku sira no grupu organizasaun sira seluk atu junta forsa hodi konsolita no organiza povu iha aldeia, suku, postu no munisipiu idak-idak. (remata)