Xanana Obserba Direita Kondisaun Uma Madre Canosiana Ainaro Ne’ebé Anin Sobu

Smnewstl.Com-Ainaro, 26 Fevereiru 2023- Udan no anin boot ne’ebé akontese iha loron 2 Janeiru 2023 liuba konsege somu rezidensia Madre Kolegio Santa Josefinha Bakhita (SANJOBA) Ainaro-Vila.

Dezastre natural ne’e akontesimentu iha oras 1:30 madrugada  rezulta uma kakuluk kalen no besi anin sobu sai hodi halo udan bee tama too rezidensia laran, inklui fatin reja nian bokon, no kondisaun plafon komesa dodok halo bee sulin tama too uma laran bainhira udan bebeik.

Haree ba problema ida ne’e, Lider Istoriku, Xanana no Fransisco Kalbuadi Lay no Padre Igreja Parokia Ainaro, Eugenio hala’o vizita urjente iha domingu (26/02/23) kalan hodi haree direta kondisaun ne’ebé  afeita ba madre sira.

Me. Maria Fatima Pereira informa anin no udan boot ne’ebé akontese iha loron 2 Janeiru too fulan Fevereiru sei kontinua akontese bebeik halo uma kakuluk komesa kansobu ba bebeik.

“Maun boot kalan boot anin mai sobu no lori sai kalen no besi uma kakuluk foti sai monu hotu ba uma oin, ami preokupa  kalan toba la dukur, anin makas akontese bebeik bebeik uma sei naksobu hotu,” dehan Me. Maria.

Hafoin akontesimentu, sira nia parte relata kedas situasaun ne’e ba Superior Madre Canosiana Dili no Don Virgilio Kardeál do Carmo da Silva.k

Padre Parokia Ainaro, Eugénio hatutan, anin boot la’òs sobu deit madre sira nia rezidensia, maibé kuaze sarani Ainaro lubuk ida ne’ebé hela iha área parte foho nia uma mós anin sobu.

“Avó Nana hahú kedas iha Janeiru too agora anin no udan akontese kalan loron sobu uma lubuk ida,” nia hatete.

Entretantu, Xanana Gusmão preokupa, alende sala madre sira nian hetan estragus, anin sobu mós Edifisiu Eskola Terseiru Siklu no Sekundariu (SANJOBA) hodi afeita ba estudante sira susar atu toba no hela.

Xanana promote sei haruka ekipa balun atu ajuda madre sira hodi hadia hikas kondisaun uma refere.

“Ita sei haree hodi buka dalan para mai hadia tiha lai kondisaun ida ne’e para udan been labele tama,” dehan Xanana.

Entretantu, Kolegio Santa Josefinha Bakhita (SANJOBA) Ainaro-Vila lidera hosi  Superiora Me. Elda Albina Bibina Fdcc, hamutuk ho Me. Maria Fatima Pereira, Emmiliana Soares Fdcc, Me. Dulce Fdcc no Me. Dulce Fdcc durante ne’e tau matan ba estudante hamutuk na’in 15 no estudante lubuk ida ne’ebé hala’o sira nia estudu iha Eskola Terseiru Siklu no Sekundariu Kolegio Santa Josefinha Bakhita (SANJOBA) Ainaro-Vila.(Smnews)