Xanana ho Embaixador Amerika Koalia Oras Rua Resin Iha Bairos dos Gerilos

SMnewstl Media Online – Partido Congresso Nacional de Timor Leste (CNRT) liderado Eis Lider Rezistensia, Kay Rala Xanana Gusmao
simu ofisial vizita husi Embaixador Estado Unidos Amerika iha Timor Leste, Kevin Blackstone, Segunda feira nee iha Sede Bairos dos Gerilos Dili hodi hahu komunika ba malun kona ba apoio Amerika nian ba prosesu dezenvolvimentu iha rai laran.

Relasaun povu Timor Leste ho povu Amerika metin nanis ona desde kedas luta ba libertasaun patria nomos konstrusaun estado.

Hafoin sorumutu durante oras rua resin, Diplomata Amerika nee ba jornalista hateten, sente onrado hasoru Kay Rala Xanana Gusmao.

“Hau sente kontenti hasoru maun boot Xanana Gusmao, nebe hau bolu hanesan aman ida. Hau mos hasoru ona lider Partido Politiku balun, maibe ho Maun Boot, nee onra ida maske antes nee ami rua hasoru malu ona iha Tasi Tolu,”tenik Diplomata nee.

Nia hatutan, hanesan Embaixador foun nafatin akompanha prosesu dezenvolvimentu iha Timor Leste no protidaun atu kontinua fo apoio.

Lori povu Timor Leste, Kay Rala Xanana Gusmao agradese ba apoio povu Amerika mai Timor Leste no hein katak, relasaun ida nee sei kontinua metin ba bebeik.

Lider Nacional nee konsiente katak, hanesan nasaun nebe kik presiza nafatin tulun husi Povu Amerika. Nia hakarak atu Timor Leste ho Amerika sai belun nebe diak liu tan iha futuru.

“Ita nia rai nee, rai ida ki’ik, ita la buka inimigu, maibe buka maka amigo barak liu hodi nunee mai ajuda ita. Ajuda iha hanoin, ajuda iha hahalok no seluk tan. Tamba ne’e dala ida tan, hau hakarak hato’o obrigado no agradese ba Povu Amerika liu husi sira nia Embaixador tuir saida maka ohin ami rua diskuti.(**)