Xanana Gusmao Iha Oecusse, Vizita Orfonato Topus Honis Inklui Apoio Aihan ba Populasaun Iha Kutete

Smnewstl.com 18-09-2021 (Oecusse)– Lider Nacional, Kay Rala Xanana Gusmao dadaun ne’e iha ona Regiaun Autonom Espesial Oecusse Ambeno hodi akopanha prosesu judisial ba kazu eis Padre Amerikanu Richard Dasbach, ne’ebe diskumfia halo abuzu sexual ba labarik sira iha Orfonato Topus Honis.

Prezensa Eis Presidente Republika nomos Xefe Executivo ne’e hanesan reafirma ona antes, laos atu halo intervensaun ba prosesu judisial, maibe hakarak hatur justisa ba kazu ne’e ho lolos.

Xanana Gusmao ho ekipa ne’ebe to’o Oecusse ohin dader madrugada, (18-09-2021), iha oras lokoraik desloka kedas ba iha Aldeia Mahata, Suco Costa Bairo Kutete, Posto Administrativo Pante Makasar hodi apoio aihan ba Orfonato sira iha Topu Honis inklui mos aihan ba rezidente atus ida resin iha fatin refere.

Prezensa eis Komando da Luta ne’e simu entusiasmu husi komunidade sira tamba konsiderado dahuluk maka sama ain iha sira nia helik fatin hodi observa direita sira nia kondisaun.

Ba Xanana, populasaun sira haktuir, Kutete iha nia istoria rasik durante luta ba ukun rasik.

Iha tinan 1999, populasaiha barak mak ba subar hotu iha neba no maioria hetan apoio aihan husi eis Padre Richaed Dasbach.

“Momentu neba, ami hotu mai helik a’an iha ne’e no amo maka apoio aihan mai mai. Karik momentu neba maka ami la mai iha ne’e la hatene ohin loron oinsa karik,”hato’o Agustino Colo.

Ho expresaun kontenti, Agustino sublinha tan katak, Xanana Gusmao mak lider ida ne’ebe sempre lao husi lidun ida ba lidun seluk buka hatene problema ne’ebe povu infrenta. Nia hein katak, maromak kontinua haraik vida naruk ba Xanana Gusmao hodi konkretiza mehi luta ba liberta povu.

Biban ne’e, eis lider rezistensia mos tau aifunan ba sidadaun rua ne’ebe maka mikisia oho mate iha fulan Setembro tinan 1999.

Xanana promete atu halo monumentu ida nune’e kada tinan familia sira bele husu misa no sunu lilin hodi fo onra ba sira nia isin ne’ebe oferese ba rai ne’e.

Husi sorin seluk, aliende apoio aihan fo mos roupa ne’ebe oferese husi grupu feto iha Dili hanaran a’an feto iha asaun hodi oferese tutan ba foinsae feto no mane inklui inan aman. (Rio)