Xanana Gusmao Iha Jogu Futebol Amigavel Entre Autoridade RAEOA vs Judisiario

Smnewstl.com Media online -Lider Nacional, Kay Rala Xanana Gusmao durante vizita iha Regiaun Autonom Oecusse Ambeno hodi akompanha proseu judisial ba kazu eis Padre Dasbach la husik le’et mos tempu livre asiste jogu amigavel entre Autoridade RAEOA liderado Arsenio Paixao Bano hasoru Autoridade Judisiario.

Jogu Futebol Amigavel ne’e halao tuku lima oras Timor Leste lokoraik iha Kampu Futebol Webau, Aldeia Sanane, Suco Costa, Posto Administrativo Pantai Makasar, organiza husi Autoridade RAEOA.

Autoridade Judisiario liderado Juiz Hugo da Cruz Pui esplika, jogu refere halao dala rua ona ho objetivu anima sosiedade tamba durante pandemia Kovid-19, atividade hotu kuaze paradu tno halo komunidade sira la sente animadu.

“Jogu ne’e halao dala rua ona, iha semana kotuk ita partisipa, no ohin komu Avo Nana iha ne’e hela, entaun ami kordena ho advogado no husu para Avo mai asiste,”informa Juiz Administrador ne’e

Nia hatutan, autoridade judisiario ne’ebe partisipa iha jogu ne’e kompostu Juiz, Procurador, Advogado, Ofisial Judisiario inklui mos PNTL.

Kay Rala Xanana Gusmao ne’ebe husu atu hasai fotografia ho ekipa rua hanesan dokumentasaun louva inisiativa Autoridade no husu iha kontinuasaun tamba konsiderado atividade sira nune’e importante hodi anima povu.

“Diak, kontinua halao nafatin tamba importante tebes anima ita nia komunidade sira,”hato’o Xanana iha konversa

Presidente Autoridade RAEOA, Arsenio Paixao Bano rekuinese, atividade desportivas paradu kauza husi Kovid-19, maibe agora hahu halao fali ona no komunidade sira mos sente animadu.

Jogu amigavel ne’e rasik lao diak no hetan partisipasaun mos husi komunidade. Enkuntu jogu refere partisipa mos husi Amo Paroco Oecusse.(Rio)