Xanana Dezafia KAK no Tribunál Justifika Ezekusaun Fundus COVID, Sesta Bazika no Fahe Osan $200

Smnewstl.Com-Ainaro, 26 Fevereiru 2023- Prezidente Partidu CNRT, Kay Rala Xanana Gusmão dezafia Komisaun Anti Korrupsaun (KAK) no Tribunál de Kontas atu halo monitorizasaun ba gastu orsamentu estadu ba fundu COVID, osan ba sesta bazika no fahe $200 ba povu Timor-Leste.

Xanana dehan, too agora nia rasik husu justifikasaun ba relatóriu ezekusaun orsamentu ne’e la hatudu ba transparansia iha públiku.

“Too agora ita lahatene gastu orsamentu ba fundus COVID no sesta bazika no osan $200 ne’ebé simu no fahe osan tun sae ne’e ita la hatene nia transpransia. Tanba tribunál ka justisa mós la husu no KAK (Komisaun Anti Korrupsaun) mòs taka matan,” dehan Xanaan durante konsolidasaun regionál partidu CNRT   salaun Parokia Vila-Maria, Ainaro, domingu (26/02/23).

Xanana dehan, durante ukun, sistema finansas estadu nian ne’ebé monta diak tebes iha Ministeiru Finansas, Governu atuál sobu hotu nia sistema halo jestaun orsamentu estadu la’o runguranga.

Nia hatutan, tuir dadus ne’ebé nia parte rekolla, nota katak iha membru governu balun gastu orsamentu kiik liu, tanba sira la iha kapasidade atu halo ezekusaun ba orsamentu estadu no buka hadia problema no susar ne’ebé povu hasoru.

“Ita nia sistema finansas ne’ebé mundu rekoñese di’ak tebes, sira (governu) estraga hotu, sesta bazika fundus COVID ita la hare nia sistema, ita nia sistema finanseiru ne’e ninia prinsipiu boot ida maka ne’e.  Se ha’u fó  osan ba membru governu ida, durante tinan nia gasta, nia tenki konfirma nia gastu iha relatóriu tenki hatudu rezultadu osan ne’e gasta hira no restu oinsa, se osan la gasta tenki fila ba konfre estadu,” Xanana preokupa.

Xanana rekoñese katak, foin lalais hasoru malu ho reprezentante ADB no Banku Internasionál deskute liu kona-ba jestaun orsamentu estadu nian inklui buka hadia sistema orsamentu estadu nian hodi la’o tuir sistema internasionál ne’ebè hatudu transparansia liu atu tulun governu iha governasaun di’ak.

Eis Primeiru Ministru ne’e hatutan, durante tinan lima ukun, Eis Prezidente Repúblika, Fransisco Guterres Lú-Olo  halo violasaun ba konstituisaun da Repúblika hodi hafraku airin haat estadu nian hanesan, prezidente, parlamentu nasional, governu no tribunál.

Tuir Xanana atu kuriji erro hirak ne’e hotu, tanba CNRT organiza povu Timor-Leste hodi apoia Premiadu Nobel ba Dame, José Ramos-Horta sai prezidente atu kurije no hadia imajen estaud iha mundu tomak.(Smnews)