Xanana : Delta Iha tia Ona, “Favor” Taka Metin Fronteira

Smnewstl.com Media online-Eis Presidente Republika no Primeiro Ministro, Kay Rala Xanana Gusmao bolu atensaun ba ukun nain sira atu konsidera Pandemia Covid-19 hanesan problema seriu nune’e la hamosu duvida iha sosiedade.

Eis Lider Rezistensia transmite apelu ne’e iha selebrasaun misa Domingo santa, iha Paroquia Sao Miguel Arcanjo Padiae, Posto Administrador Pante Macasar, Regiaun Autonom Oecusse Ambeno, bainhira hetan biban husi Amo Selebrante misa Carlos de Deus.

Xanana haktuir, pademia Covid-19 hanesan problema mundial, tamba ne’e presiza trata ho seriu nune’e la hamosu duvida. Nia fo razaun katak, iha mundo ema besik miliaun maka lakon vida, tamba ne’e karik, la tarata ho seriu sei lori perigu ba povu.

“Ita nia nasaun iha deit ema satu juta resin, ita la tarata covid-19 hanesan problema seriu, nee perigozu tebes. Tinan kotuk, hau lao haleu Fronteira hodi bolu atensaun atu evita jalan tikus, agora ita rona dehan virus foun ida tan ho naran Delta mos tama tan ona mai, ita iha tia ona Delta 1,2,3 to 4, maibe se’e ita nafatin loke Fronteira maka ita rasik maka kontribui hodi hatama covid mai,”tenik Xanana

“Imi mate, laos hau nia kestaun, maibe problema mai hau se’e imi mate hotu maka ita nia kultura baikenu mos sei lakon. Hau husu ba imi favor kumpri mos ba regra uja maskra, fase liman nomos seluk tan hodi salva ita nia a’an”.

Nia hatutan, covid sai problema tamba dala ruma atendimentu mak ladun masimu tamba lori sidadaun pozitivu sira ba Kuarantina la sona no hemu aimoruk, maibe rekoperadu ona.

“Dala ruma ita hanesan atu fiar ou la fiar oituan maka lori ita nia sidadaun sira ba Kuarantina la hemu aimoruk, maibe rekoperadu, mas ne’e laos kestaun. Kestaun maka salva vida umana importante liu buat hotu”

Antes hakotu, eis lider rezistensia bolu atensaun ba populasaun iha teritorio liliu povu atonim Oecusse atu hakbesik a’an ba Centru Saude simu vasina nune’e livre husi Covid-19.

“Hau idade ona no kompleta simu vasina, atu sala ita nia a’an, favor hakbesik ba Centru Saude simu Vasina hodi salva ita nia a’an,”husu Xanana