Xanana Dejafia Estudante Timoroan Iha Japao Estuda Mak’as Dezenvolve Nasaun

Smnewstl.com 21-11-2021 (JAPAUN) – Komandante Eim Xefe das Falintil, Kay Rala Xanana Gusmao dadaun ne’e iha hela Japao molok kontinua ba Portugal iha loron 26 Novembro 2021.

Xanana desloka husi teritorio nacional iha loron 18 Novembro 2021. Iha Japao lider nacional ne’e sei simu Honorario Doctorate husi Universidade rua.

Ba loron dahuluk iha atividade vizita servisu nian, ohin (Domingo, 21-11-2021) eis Presidente Republika no Primeiro Ministro halao soromutu ho Asosiasaun Estudante Timoroan iha Japan hodi hato’o mensajen kona-ba komemorasaun loron Proklamasaun Independensia RDTL ba dala 46 (28 de Novembro de 1975).

Iha mensajen ne’e, Xanana dezafia estudante Timoroan nain- 39 kompostu mane 28, feto 11 hotu atu aproveita momentu importante osan mean iha estudu ne’e fo tempu estuda makas, nune’e remata estudu fila ba Timor bele kontribui rekursu harii estadu no nasaun hodi fo valor mos ba familia no sosiedade.

Xanana hato’o mos agradese ba Governu Japaun ne’ebe hatudu domin ajuda povu Timor -Leste iha situasaun krusial too Agora.

Antes hato’o mensajen, estudante hotu foti liman fo KONTINESIA ba EROI hotu ne’ebe luta no mate ba rai doben ne’e atu tulun nafatin Timoroan hamutuk harii DAME kontribui ba prosesu dezenvolvimentu Nacional.

Vizita Xanana ba Japaun akompana direita hosi Embaixador Timor -Leste ba Japaun, Ilidio da Costa Ximenes no ekipa protokolu.

Durante vizita, Xanana sei hasoru malu mos ho Eis Reprezentante Sekeretariu Jeral ONU ba Timor-Leste, Sukihiro Hasegawa no Lider Importante seluk tan hodi ko’alia konaba kooperasaun servisu entre Timor-Leste no , Japaun.(*/rio)