Vitima Inséndiu Tasi Tolu Hirus Líder No Autoridade Ne’ebé Dun Xanana Buka Votus

Smnewstl.com– DILI, 02 MARSU 2023- Vítima inséndiu ne’ebé evakua husi Tasi – Tolu mai Palásiu Prezidensiál Bairru Pité nia kotuk hirus autoridade no líder politiku balun ne’ebe dun Líder Nasionál Kay Rala Xanana Gusmão, katak buka votus liu husi tulun vítima inséndiu.

 “Avó lori ami atu politiza ne’e la iha, Avó ne’e ita hotu hatene, asaun karidade ne’e la’òs foin primeira vez, la’òs tempu politika mak halo asaun karidade ne’e la iha, Avó kualker dezastre avó direta no besik liu povu, hadomi povu, ami hasoru sai de’it sempre hasai ami husi susar no terus,”  tenik vítima Dulce Barros da Costa ba jornalista iha sira nia hela fatin provizoriu, Bairru-Pité, Dili.

Líder Nasionál ne’e, vizita vitima sira bahihira fila husi Cobalima no vitima sira, aprezenta sira nia laran susar no terus ba Xanana Gusmão.

“Momentu akontesimentu sira Bombeiros evakua kedas ami mai Malinamuk ne’ebá no toba kalan rua no loron rua ne’ebá, iha loro-kraik, Avó (Xanana) fila husi Suai, vizita fatin refere, avó husu ami, nusá imi di’ak ka lae? Maibé ami la iha lifuan atu hatan di’ak ou la di’ak, ami ho de’it matan-wen hasoru Avò dehan ami nia kondisaun mak hanesan ne’e”, haktuir vítima ne’e ho laran triste.

Antes muda ba Bairru Pité, Líder Nasionál ne’e husu ona governu, liu husi ekipa Bombeiros Mali-Namuk Comoro atu muda sira ba Karantena Tasi-Tolu, parte Bombeiros sira esplika katak, pedidu ne’e  parte governu rejeita, ho razaun katak, vitima sira sei estraga fasilidade iha fatin ne’ebé uluk uza ba izolamentu COVID-19.

“Avo ko’alia kedas autoridade iha momentu ne’eba, atu buka kedas fatin atu sai, ita labele hare nune’e, inan isin-rua, labarik ki’ik sira toba ita senta halo nusa, entaun iha momentu ne’eba husu atu ba fatin izolamentu Tasi Tolu, maibé governu hatan katak, fatin estadu nian, la bele ba estraga fasilidade sira no hafo’er iha ne’ebá, entaun avó foti desizaun hare fatin mamuk iha palasiu Prezidente nia kotuk hodi ami hela provizoriu iha ne’e,” hateten vítima ne’e.

Tuir Dulce Barros, Lider Nasionál lori uluk matabixu ba vitima sira iha tuku hitu dader no iha tuku walu hamutuk ho Prezidente Repúblika, José Ramos-Horta fila dala ida tan ba Tasi Tolu, hodi buka solusaun.

“Avó Nana ho Prezidente Repúblika, José Ramos-Horta ba fali ami nia fatin, ba avo dehan katak, ko’alia ho autoridade Munisipiu Dili atu rezolve lalais ami nia fatin, tanba la seguru ba ami no inan isin rua no labarik atu toba, entaun Prezidente autoridade dehan agora ami prepara ona kos para sira atu hela, maibe avo dehan kos ne’e labele tanba sira ho kondisaun, inan balun labarik barak no kos la sufisiente atu hela, entaun Prezidente Munisipiu simu avo nia liafuan katak, ida ne’e kompetensia governu nian nune’e avo fila no avo dehan los ona, imi nia governu sei atende imi ho di’ak,” Hateten vitima.

Hafoin akontese diskussaun entre Lider Nasional ne’e ho Prezidente Autoridade Munisipiu Dili, familia 39 ho membru hamutuk 178 mak deside evakua provizoriu ba Bairru Pitê no 11 seluk deside hamutuk ho familia iha Tasi- Tolu no Komoro.

“Ami hanesan vitima to’o ami hetan sofrimentu bo’ot nune’e, hela fatin ne’ebe ahi-han ona, ami la hatene atu ba los ne’ebé, sekarik desizaun klaru ba ami la iha no ha’u duni tuir avo to’o portaun, ha’u dehan Avo atu ba ne’ebe ami tuir Avo, tanba ami hatene katak, Asaun karidade ne’e la’os ba ami mesak, Avo halo kuaze Timor-laran atu inundasaun fali , ahi-han merkadu Komoro, Tasi Sa’e ba kotuk, avo mak hamutuk ho ami no ami fi’ar avo atu lori ami ba di’ak,”

Lider Nasionál ne’e fo opsaun ba vitima sira, atu hili dalan ne’ebé di’ak liu, hodi proteje labarik sira no inan isin-rua.

“La obriga balun ne’ebé hakarak tuir ha’u ba fatin ne’ebé mak prepara bele sa’e kareta, balun ne’ebé mak lakohi bele tuir governu nia desizaun ba kos ou ba fatin seluk tuir governu, entaun ha’u ko’alia ho vitima sira, oinsa imi tuir desizaun governu atu ba kos ka da ne’ebé ha’u hato’o ba avó ho prezidente ne’e,”

Tanba ne’e, vitima Mário Martins deklara katak, asaun karidade husi Líder Nasionál Xanana Gusmão halo, la’os buka votus, maibé tan líder ne’ebé sempre ho povu iha momentu difísil nia laran.

Mario hatutan, sira deside tuir Xanana, tanba dezde tinan kotuk bainhira mosu pandemia COVID-19 no dezastre naturál akontese iha Dili no munisipiu sira, ahi han iha merkadu Taibesi, Merkadu Komoro Xanana maka tuun direita ajuda povu no bainhira sidade Dili foer Xanana sempre organiza povu hodi hamoos foaer iha kada bairru sira.

“La’os foin mak ida ne’e de’t, asaun ne’e uluk kedas la’òs hare ba kór,  maibé oinsa atu salva povu husi ki’ak no mukit. Fulan tolu ba kotuk mos hanesan, la’òs tanba polítika, maibé tanba povu ida ne’e. Iha situasaun emerjensia, kualker lider ne’ebe mak iha hanoin atu salva ami, la’òs buka votus, asaun karidade ne’e ho hanoin rasik, ami povu hatene, lider tau-matan ba ami mak ne’e,”  hateten Mário Martins.

Entretantu, inséndiu ne’ebé akontese iha loron 23 fulan Fevereiru, afeta familia hamutuk 50, maibé dadaun ne’e família hamutuk 39 ho membru hamutuk 178 mak hela provizorimente iha Bairru Pité, inklui mós labarik sira, ne’ebé eskola hela iha pré eskolar no ensinu báziku.(smnews)