Viola Segredu Justisa, AC Hatan Iha Tribunal

Smnewstl.com (Dili) — Tribunál Distritál Dili (TDD), sábdu (21/08/21) halo ona julgamentu primeiru interrogatóriu bá arguidu ho inisiál AC no aplika medidas koasaun aprezentasaun periódika fulan ida bá Ministériu Públiku ligadu ho kazu Topu Honis ne’ebé diskonfia involve eis Padre Ricard Dasbach.

Tribunál distritál Dili halo julgamentu primeiru interrogatóriu bá arguidu AC, hafoin kumpre tiha oras 72 iha sela polísia Kaikoli Dili.

Advogadu Privada, Adelaide Trindade hateten, ministériu públiku imputa kazu tolu bá nia kliente ho inisiál AC ho krime tolu mak hanesan, violasaun segredu justisa, ameasa, no violasaun segredu.

Tanba ne’e defeza ne’e konsidera, desizaun ne’ebé tribunál aplika bá sira-nia kliente ne’e adekuadu duni, tanba krime tolu ne’e laiha indísius ne’ebé forte atu kondena sira-nia kliente AC.

“Tribunál koasaun aprezentasaun periódika bá ami-nia kliente fulan ida dala ida, ida-ne’e medidas ida-ne’ebé mak ami sente adekuada bá ami-nia kliente, tanba krime ne’ebé mak imputa bá ami-nia kliente iha tolu, maibé bainhira iha prosesu primeiru interrogatóriu, laiha indísius ne’ebé mak forte hodi kondena ami-nia kliente, iha krime tolu ne’e ida mak violasaun segredu justisa, ida ameasa, ida mak violasaun segredu,” dehan Advogada Privada, Adelaide Trindade, sábdu (21/08/21) hafoin remata julgamentu iha TDD, Dili.

Ho desizaun ne’e, Adelaide dehan, sira-nia kliente AC kopera ho justisa, nune’e hein prosesu normál investigasaun nian.

“Entaun tribunál aplika ona medidas ida-ne’e, ami-nia kliente kopera ho tribunál hodi hein prosesu normál, agora iha faze investigasaun,” informa Adelaide.

Julgamentu primeiru interrogatóriu ne’e, prezide husi juíz singulár, José Gonçalves no Ministériu públiku reprezenta husi prokuradór Matias Soares.

Arguidu hetan asisténsia legál husi advogadu privadu, Miguel Faria no Adelaide Trindade.

Polísia Nasionál Timor-Leste (PNTL) liu husi Servisu Investigasaun Kriminál Nasionál (SIKN) ezekuta mandadu buska, apreensaun no detensaun ho NUC 0048/21.PGGCC bá arguidu AC iha Rejiaun Administrativa Espesiál Oe-cusse Ambenu (RAEOA) iha loron kinta (19/08/21), tanba diskonfia arguidu AC publika kazu Topu Honis nian.(ant)