Vice MI Hakarak Rekruta Membro PNTL Foun 700, PM Seidauk Deside

Smnewstl.com 25-10-2021 (Dili) – Maske Vise-Ministru Interiór ho Komandu Polísia Nasionál Timor-Leste (PNTL) propoin ona orsamentu milliaun $ 6 bá governu liu husi Komisaun Revizaun Orsamentu Polítika (KROP) iha Orsamentu Jerál Estadu (OJE) tinan 2022 atu halo rekrutamentu bá membru Polísia foun iha tinan oin ho toral hamutuk 700, maibe desizaun fila fali ba Ministro Interior atual Primeiro Ministro.

Vise-Ministru Interiór, António Armindo justifika, seidauk iha desizaun husi Ministru Interiór atual PM, Taur Matan Ruak kona-ba rekrutamentu iha tinan oin.

Nia hatutan, dadauk ne’e ekipa husi Ministériu Defeza ho Interiór mos sei diskuti hela bá futuru kona ba rekrutamentu konjuntu entre membru PNTL ho FALINTIL Forsa Defeza Timor-Leste (F-FDTL).

“Enkontru Ministru Defeza ho Ministru Interiór fó sai iha média katak, rekrutamentu sei akontese mais konjuntu, ne’e mak seidauk. Foin dadauk ita propoin ona KROP, maibé depois hasai tiha, ne’e desizaun Ministru Interiór nian parese sei iha meius. Kuandu rekruta jatamente presiza osan 5 ou 6 milloens, ne’e inklui ona gastus fulan 6 ne’ebé atu halo treinamentu bá membru foun sira, mais no fim labele. Ne’e desizaun Primeiru-Ministru hanesan Ministru Interiór nian,” dehan Vise-Ministru Interiór, António Armindo, iha salaun Novu Turízmu Dili, Segunda ne’e.

Executivo ne’e konsidera, presiza duni halo rekrutamentu bá PNTL, tanba dadauk ne’e, membru barak mak moras no balun idade la produtivu ona atu halo servisu.

“Foin dadauk, PNTL ho Ministériu Interiór ha’u rasik, ami deside atu halo rekrutamentu bá membru foun pelo menos 700, tanba haree ho realidade ida agora, ema balun mós moras balun idade la produtivu ona, ne’e presiza iha rekrutamentu foun bá sira para bele kontinua servisu halo manutensaun orden públika iha Timor-Leste. Maibe desizaun tomak iha Primeiru-Ministru hanesan Ministru Interiór nia liman,” subliña António.

Kona ba rekrutamentu konjunta, governante komfirma tamba hakarak atu kria amizade entre membru sira husi instituisaun rua hahú husi treinamentu, hafoin bele fahe malu bá kada instituisaun.

Atu realiza promesa sira hotu, tuir Antonio presiza orcamento. Nia dehan bainhira laiha orsamentu maka labele atu halo buat ida maske hakarak halo rekrutamentu.

Antes ne’e mós, Ministru Defeza, Filomeno Paixão de Jesus, husu orientasaun polítika husi Primeiru-Ministru no Ministru Interiór, Taur Matan Ruak, kona-ba rekrutamentu konjuntu entre PNTL ho F-FDTL.

Oras ne’e dadauk, prosesu diskusaun la’o hela, no tuir planu, Ministru Defeza, Filomeno Paixão de Jesus sei aprezenta bá konsellu ministru iha fulan Outubru ne’e hodi hetan deliberasaun, nune’e bele halo rekrutamentu.(ant)