Vasina Terseira Doze Prioridade Bá Ekipa Frente Ho Grupu Vulnerável

Smnewstl.com 28-09-2021 (Dili) – Ministra Saúde (MS), Odete Maria Freitas Belo hateten, vasina terseira doze ne’e sei la fó bá ema hotu, maibé sei fó prioridade liu bá ekipa ne’ebé servisu iha liña frente no mós grupu vulnerável sira.

Tanba ne’e, Odete Belo dehan, oras ne’e dadauk, ekipa independente husi ministériu saúde, servisu hamutuk nafatin Organizasaun Mundiál Saúde (OMS), nune’e bele fó atensaun nafatin bá buster trseira doze ne’e mai iha Timor-Leste.

Maibé atu sosa vasina terseira ne’e, depende mós bá disponibilidade husi governu Timor-Leste nian, bainhira iha orsamentu sufisiente par komprra buster refere.

“Bá terseira doze ida-ne’e ita la fó bá ema hotu, sé nafatin adere bá iha OMS no mós ekipa independente husi ministériu saúde nian nafatin ita fó atensaun bá terseira doze bá iha liña frente sira, bá sira-ne’ebé mak vulnerável teb-tebes atu bele hetan terseira doze ida-ne’e. Maibé, depende mós bá nasaun ninia disponibilidade orsamentu,” dehan Ministra Saúde, Odete Belo iha plenária Parlamentu Nasionál (PN) Tersa ohin.

Odete esplika, molok simu terseira doze, sidadaun sira tenki kompleta uluk vasina primeiru ho segundu doze, hafoin governu sosa vasina terseira mai Timor-Leste.

“Ha’u ko’alia hanesan ne’e tanba, primeiru ita tenki kompleta uluk primeiru doze ou segunda segunda doze, hafoin ita ko’alia bá terseira doze, tanba primeira ou segunda doze de’it mós ita-nia partisipasaun sei menus teb-tebes. Sé ita iha orsamentu ne’ebé mak sufisiente par atu bele sosa vasina buster ida-ne’e, ema hotu bele iha direitu bá vasina terseira doze ga busta,” tenik nia.

Tanba ne’e, governu kontinua hein hela rezultadu husi ekipa idenependente husi ministériu saúde ne’ebé servisu hamutuk ho OMS, tanba to’o oras ne’e seidauk iha informasaun ruma kona-ba vasina doze datoluk ne’eb’e sei fó bá grupu vulnerável ho pessoál liña frente sira.

“Tanba ne’e mak ita nafatin dehan, iha fó terseira doze bá grupu vulnerável sira, bá ita sira-ne’ebé mak la’ós vulnerável tenki konsiente katak, ita hakarak simu ga la’e? Tanba ita mós lakoi ita lori vasina mai depois ita haksesuk malu hakarak simu ga lakoi ikus mai vasina bele estraga iha ita-nia fatin,” subliña nia.

Alemde ne’e, governante ne’e mós informa tan katak, governu mós prevé ona orsamentu atu sosa vasina bá doze datoluk nian.(ant)