UPM Koloka Membru Fó Seguransa Másimu Bá Perfurasaun Mina Iha Suai

Smnewstl.com 06-10-2021 (Dili) – Polísia Naisonál Timor-Leste (PNTL), liu husi Unidade Polísia Marítima (UPM) koloka ona membru hodi fó seguransa másimu bá ekipamentu perfurasaun mina iha Portu Suai Loro munisípiu Covalima.

Ekipamentu refere hatama husi kompañia Timor Resources husi Surabaya Indonézia mai Timor-Leste iha domingu foin lalais ne’e, tanba kompañia refere hetan fi’ar husi governu hodi halo perfurasaun mina iha tasi parte Suai nian.

Komandante UPM, Superintendente Basílio de Jesus informa, hafoin ró husi kompañia Timor Resources nian atraka iha Portu Suai Loro iha Domingu foin lalais ne’e, UPM koloke kedas membru sira hodi fó seguransa másimu bá ekipamentu perfurasaun hirak ne’e, nune’e ema iresponsável sira labele estraga.

“Domingu foin dadauk ró mai husi Surabaya Indonézia para iha ne’ebá lori ekipamentu perfurasaun mina iha ne’ebá, entaun iha ne’ebá mós ita iha seksaun rua, kuaze 18 pessoas UPM destakadu iha postu Suai Loro no mós postu vizilansia mota-masin fronteira. Sé ita ko’alia kona-ba seguransa perfurasaun mina, UPM nia papel mak seguransa iha Portu Suai Loro,” dehan Komandante UPM, Superintendente Basílio de Jesus, iha servisu Lecidere, Dili. Kinta ohin.

Oras ne’e dadauk, membru UPM postu Suai Loro halo hela seguransa bá ekipamentu pezadus bá perfurasaun mina sira-ne’ebé mak hatun husi ró kompañia Timor Resources nian.

“Entaun ha’u orienta fó seguransa másimu bá ekipamentu sira-ne’e, ho nune’e, ekipamentu sira-ne’e labele hetan estragus husi ema ne’ebé laiha responsabilidade. No ha’u orienta tan ha’u-nia membru sira, asu de’it mós labele bá bok sasán sira-ne’e, fara mais ema, atu destroi ou atu estraga sasán sira mai husi Timor Resources hodi halo perfurasaun mina iha Suai,” subliña nia.

Komandante ne’e dehan, desde tinan 2020 to’o agora, UPM nafatin fó seguransa másimu bá ekipamentu pezadu ne’ebé hatama husi Indonézia mai Timor-Leste.(ant)