UPM Kaptura Autór Ne’ebé Hatama Sasán Ilegál Mai TL

Smnewstl.com 30-08-2021 (Dili) — Polísia Nasionál Timor-Leste (PNTL) liu husi Unidade Polísia Marítima (UPM), Tersa-feira madrugada ohin, kaptura sidadaun na’in-5 ne’ebé hatama sasán ilegál husi Indonézia mai Timor-Leste iha área dolok oan Cris Rei munisípiu Dili.

Autór hirak ne’e, autoridade polísia kaptura iha tuku 2;49 madrugada, inklui prende mós sasán hanesan sigaru joker karton 40, no mós evidénsia seluk hanesan, kareta truck ida, motorizada ho marka beat ida, inklui kareta autór ne’ebé hanesan na’in bá sasán.

Porta-voz Komandu Jerál PNTL, Superintendente Xefe Arnaldo de Araújo hateten, iha autór na’in 2 husi Indonézia mak hatama sasán hirak ne’e mai, no mós timoroan na’in 4 ne’ebé hanesan traballadór hodi simu sasán hirak ne’e.

Maibé, na’in 4 mak UPM konsege kaptura, enkuantu na’in 2 halai lakon, inklui sidadaun Indonézia ida ho naran inisiál A ne’ebé nu’udar na’in bá sasán sira-ne’e.

“Hodi kalan iha tuku 2:49, Komandu tátika UPM hala’o patrullamentu iha área Cristo Rei iha fatin dolok oan konsege kaptura na’in 4 ne’ebé mak hatama sasán ilegál, totál ema iha ne’ebá sira na’in 6, na’in UPM konsege kaptura, na’in 2 halai liu, ida-ne’ebé halai liu ne’e, ida-ne’ebé kapitaun ka’er ró ne’e, ida fali na’in bá sasán sira-ne’e,” dehan Superintendente Xefe, Arnaldo de Araújo, iha Komandu Jerál, Tersa ohin.

Autór ne’ebé hatama ilegál na’in 6 ne’e, na’in 2 sidadaun Indonézia, no 4 sidadaun Timór ne’ebé hela iha parte Komoro postu administrativu Dom Aleixo nian.

“Agora dadauk sira na’in 4 ne’e iha hela UPM nia liman hodi hein investigasaun tuir mai, ida mak nasionalidade ema Indonézia iha Atapupu, sira na’in 3 ema husi Dili hela iha área Madohi, balun iha Komoro, balun iha Masin Lidun, balun hela iha Raikotu, evidénsia ne’ebé mak UPM sira ka’er ró ahi oan ida ho nia motor Jonson, kamioneta baskulante ida, sigaru joker dos 40 no kareta suzuki ki’ik oan ida ho motorizada ida,” haktuir nia.

Sorin seluk, Komandante UPM, Superintendente Basílio de Jesus informa, durante ne’e UPM buka tuir autór hirak ne’e hatama sasán ilegál mai Timor-Leste hanesan sigradu kuaze dala 8 ona hahú husi fulan Jullu to’o Agostu, maibé la konsege kaptura.

Sidadaun Indonézia na’in-2 sai husi Atapupu mai Dili, ho ró bero ida, sidadaun estrajeirus na’in 2 ne’e, ida ajudante hatun sasán ne’e UPM konsege ka’er, enkuantu kapitaun ró UPM la konsege kaptura, tanba halai lakon.

Tanba ne’e Basílio dehan, autór hirak ne’e sei kumpre sela durante oras 72, nune’e polísia sei aprezenta auto-notísia bá Ministériu Públiku, nune’e bele submete bá primeiru interrogatóriu iha tribunál, tanba konsidera ne’e krime fragante delitu.

“Sim konserteza, kualkér situasuan ne’ebé mak iha ona operasaun ilegál ne’e tama ona krime, Ministériu Públiku hanesan na’in bá prosesu hotu-hotu tenki entrega bá iha ne’ebá, tanba iha evidénsia sigaru 40 dos, iha mós kateta, motor ida, mina lubuk ida,” dehan Komandante UPM, Superintendente Basílio de Jesus.

Posibilidade autoridade polísia migrasaun deporta fila sidadaun Indonézia ida-ne’ebé akompaña ró na’in husi Atapupu Indonézia mai Dili, tanba sidadaun refere laiha passaporte.

“Ha’u ohin mós telefone bá komandante jerál husu orientasaun labarik oan ida ema Indonézia, karik ita ha’u iha ne’e ga ou entrega bá imigrasaun hodi deporta fila-fali bá Indonézia, labarik oan ne’e sem passaporte, mais nia tuir ró depois na’in ne’e mak tula nia ajuda nia,” tenik nia.

Dadauk ne’e, UPM kontinua buka tuir autór na’in 2 ne’ebé sei halai lakon hela, nune’e bele prosesa tuir dalan legál.(ant)