UNTL Suspende Provisorio Graduasaun Bá Finalista 349

Smnewstl.com 25-08-2021 (Dili) — Universidade Nasionál Timor Lorosa’e (UNTL) deside adi’a serimónia graduasaun bá finalista hamutuk na’in 349 husi fakuldade 6, tanba governu aplika hikas konfinamentu obrigatóriu iha kapitál Dili ne’ebé sei hahú tama vigór iha loron 27 fulan Agostu 2021 tuku 23;59.

Vise Reitór Assuntu Akadémiku no Garantia Kualidade UNTL, Samuel Freitas hateten, governu liu husi reuniaun konsellu ministru, deside aplika konfinamentu obrigatóriu iha kapitál Dili, hahú tama vigór iha loron 27 fulan Agostu tuku 00;00 to’o loron 8 fulan Setembru 2021 tuku 23;59.

“No entantu ita mós iha hela situasaun ida-ne’ebé mak vírus ne’e pozitivu aumenta beibeik, entaun iha desizaun husi konsellu ministru atu aplika konfinamentu hahú orsida kalan, ne’ebé aban ne’e labele akontese tanba motivu forsa maiór, entaun ita mós fahe tiha ona indikasaun informasaun iha facebook UNTL liu-liu graduadu sira hetan asesu par aban ne’e ita adi’a, ne’ebé loloos ha’u simhamutuk 349 totál bá sira-ne’ebé atu gradua, tanba husi desportu nian ita hasai,” informa Vise Reitór UNTL, Samuel Freitas, iha kampus sentrál kinta ohin.

Samuel Freitas afirma, bainhira atu halo fali graduasaun, UNTL presiza hein fali despaixu husi Ministru Ensinu Superiór, Siénsia no Kultura (MESSK).

Nia esplika, bainhira despaixu atuál kaduka, iha ona despaixu foun iha ona.

“Ne’ebé aban ita la konsege halo graduasaun, ita hein fali data foun tuir indikasaun ne’ebé iha, tuir mós situasaun ita-nian rai laran liu-liu relasaun ho vírus ne’e rasik, tuir dadus ne’ebé iha ha’u-nia oin agrikultura 46, enjeñaria 25 sorin gradua tiha ona, FEAH 191, ida-ne’e mak loloos atu gradua, tanba sira barak liu, maibé la konsege, ekonomia jestaun 16, siénsias sosiais hamutuk 59, filojofia 12, fakuldade hirak ne’e mak atu gradua,” dehan nia.

Fakuldade 6 ne’e mak kompostu husi agrikultura na’in 46, enjeñaria na’in 25, Fakuldade Edukasaun Arte no Umanidade (FEAH) na’in 191, ekonomia jestaun na’in 16, siénsias sosiais 59 no filojofia na’in 12.

Nia hatutan, tuir loloos graduasaun ne’e realizasaun iha tinan 2020, maibé adi’a fali bá fulan Janeiru mós la konsege, tanba serka sanitária no konfinamentu obrigatóriu, nune’e balun konsege gradua duni liu husi online.

Vise Reitór ne’e dehan, fakuldade direitu seidauk, enkuantu fakuldade exjata no medisina laiha, tanba balun gradua ona liu husi online.(ant)