Universidade 12 Sumete Ona Relatóriu Ezekusaun Ijensaun Propinas ba MESSK, 6 Seidauk

Smnewstl.com 05-11-2021 (Dili) – Ministériu Ensinu Superiór Siénsia no Kultura (MESSK) simu ona relatóriu ezekusaun ezekusaun orsamentu bá ijensaun propinas, enkuantu universidade 6 seidauk submete relatóriu, tanba sei iha hela prosesu verifikasaun.

Ministru MESSK, Longuinhos dos Santos hateten, iha Orsamentu Jerál Estadu (OJE) tinan 2021, MESSK prevé orsamentu hamutuk montante rihun $ 14 hodi finansia bá programa ijensaun propinas bá estudante benefisiárius husi instituisaun universidade públika no privadu hamutuk rihun 64,589.

“Agora universidade sira fó ona relatóriu hamutuk universidade 12, 6 mak iha prosesu verifikasaun hela, ne’e universidade ne’ebé mak hanesan, UNPAZ, IOB, UNITAL, UNTL par atu bele haruka tan relatóriu mai,” informa Ministru Longuinhos dos Santos, iha Parlamentu Nasionál, sesta ne’e.

Longuinhos dos Santos esplika, tuir lei, bainhira governu transfere osan bá instituisaun universidade públika no privadu hodi halo pagamentu no re-embolsa bá estudante sira-nia osan propinas, durante loron 90 no exrende bá tan loron 15.

Nia hatutan, data final bá submisaun relatóriu ijensaun husi instituisaun universidade públika no privadu bá MESSK, iha loron 30 fulan-outubru tinan 2021.

“Ijensaun propinas bá estudante nian, dadus ne’ebé prevé 64,589 benefisiárius ne’ebé orsamentu prevé ne’e $ 5.6 milloens. Tuir lei, ministériu ga governu transfere bá universidade, universidade mak halo pagamentu ga re-embolsa bá estudante sira, dadauk ne’e tuir lei haruka, nia tenki 90 dias ezekuta no fó tan 15 dias atu bele halo relatóriu, loloos dia 30 de Outubru final,” esplika nia.

Iha primeira faze, MESSK transfere ona osan bá institituisaun universidade sira hamutuk rihun $ 5.6, tan ne’e, bainhira universidade sira hatama ona relatóriu, maka sei estabelese fali akórdu foun ho universidade sira atu realiza transferénsia tan osan rihun $ 5.6 hodi halo pagamentu semestre daruak nian.

Goverante ne’e subliña, pagamentu segundu semester ne’e, tuir lei, bainhira atividade letivas prezensiál suspende iha fulan jullu ho agostu, nune’e bele iha posibilidade atu halo ijensaun propinas bá estudante sira.

“Depois tuir mai, ita sei iha posibilidade atu halo pagamentu bá segundu semestrál bá estudante sira, tanbá tuir lei haruka katak, kuandu atividades letivas prezensiál ne’e suspende iha jullu, agustu, bele iha posibilidade atu halo ijensaun propinas bá estudante sira, tuir lei ita prevé orsamentu bá ijensaun $ 14 milloens, husi $ 14 milloens ne’e primeiru semestrál ne’e ita halo pagamentu universidade $ 5.6 milloens, tuir mai mós nafatin $ 5.6 milloens tuir ne’ebé mak iha,” esklarese nia.

Nia informa tan katak, bainhira orsamentu rihun $ 14 ne’e la konsege ezekuta hotu, maka MESSK sei haruka fila-fali bá kofe estadu, nune’e labele gasta osan arbiru, tanba osan ne’e ra’an povu nian.(ant)