UNICEF Entrega Ekipamentu ICT No Pasta Eskola Ba ME

Smnewstl. com – Ministériu Edukasaun hetan apoiu ekipamentu Informasaun, Komunikasaun no Tekonolojia (IKT) inklui pasta eskola husi UNICEF. Serimónia entrega ekipamentu ne’e hala’o iha Salaun Konferénsia Ministériu Edukasaun, Vila-Verde, segunda-feira ne’e.

Iha serimónia entrega ne’e Ministra Eduaksaun Dulce de Jesus Soares hateten, atu utiliza ekipamentu ne’ebé iha mak sei hamutuk ho INFORDEPE atu fó formasaun kona-ba oinsá mak bele utiliza ekipamentu teknolojia ne’e rasik.

“Ekipamentu ne’e efetivu tebes, iha eskola barak mak ita la iha asesu ba eletrisidade liu-liu sira ne’ebé iha área remota, entaun karik iha formasaun profesór no profesora ka iha prosesu aprendizajen presiza hatudu materia ruma liu husi ekipamentu ne’e, tanba uza solar panel hodi bele projeta matéria sira ne’ebé iha”, dehan Ministra Edukasaun.

Governante ne’e hatutan apoiu ne’ebé iha ba de’it ensinu báziku, maibé prioridade liu ba ida ne’ebé mak iha área remota, tanba ne’e ministériu Edukasaun hamutuk ho UNICEF identifika ona eskola tolu-nulu (30) iha teritóriu laran tomak, nune’e bele apoiu di’ak liután estudante no profesór/a sira hodi aprende di’ak liu tán.

Iha fatin hanesan reprezentante UNICEF Bilal Aurang Zeb Durrani hato’o agradese ba lideransa husi Ministériu Edukasaun ba komitmentu tomak hodi kria edukasaun ida ne’ebé inkluzivu no asesivél ba labarik sira hotu.

“UNICEF kontenti tebes hodi kontribui ba esforsu hirak ne’e, ho nune’e ami entrega ekipamentu Informasaun, Komunikasaun no teknolojia (IKT), ne’ebé sei ajuda asegura mantein ita-nia sistema edukasaun tuir ritmu mundu globál IKT nian”, dehan reprezentante UNICEF iha Timor-Leste.

reprezentante UNICEF ne’e hatutan, komitmentu atu suporta asesu dijitál iha setór edukasaun Timor-Leste nian, la remata de’it ho entrega ekipamentu sira, maibé ho esforsu tomak mafatin uza maneira divertida, dinámiku no interativu hodi bele atrai estudante sira atu dezenvolve abilidade importante iha sékulu 21.

Ekipamentu hirak ne’e inklui laptop 20, komputadór 4, mákina imprensaun koloridu 4, mákina scanner 2, projetór 4, toner 8 no TesPack 12 no pasta eskola 150 ba studante sira hamutuk 17,510.(SMNews)