UMDP Liderado Lidia Guterres Husu PN Hapara Diskusaun Bá Alterasaun PPL Enkuadramentu OJE no Lei JFP

Smnewstl.com Media Online  — Unidade Movimentu Demokrátiku Patriótiku (UMDP) husu Parlamentu Nasionál (PN) atu hapara ona diskusaun bá alterasaun Projetu Proposta Lei (PPL) kona-ba enkuadramentu jurídiku Orsamentu Jerál Estadu (OJE) no mós lei Jestaun Finanseira Públikas (JFP).

Porta-voz UMDP, Lídia Antónia Maria Guterres fundamenta, dadauk ne’e, Timor-Leste iha hela kuádru jurídiku ne’ebé aprova iha tinan 2009, 21 Juñu n°.13/2009 kona-ba orsamentu no jestaun finanseiru estadu nian ne’ebé sei atuál hela.

Tanba ne’e, laiha nesessidade urjénsia atu Parlamentu Nasionál atu tau importánsia bá diskusaun PPL refere.

“Lei ne’e aprova iha tinan 2009, 21 Juñu n°.13/2009, lei ne’e sei atuál hela apezar de ladún kompleksu ita-nia mákina estadu seidauk adota aaak didi’ak, ka la serve, maibé ita-nia rekursu umanu mak seidauk preparadu didi’ak atu aplika lei refere ho totalidade. Bá UMDP laiha urjénsia ida atu debate PPL ne’e tuir loloos tenki konsentra iha lei ne’ebé importante bá estadu,” dehan porta-voz UMDP, Lídia Antónia, liu husi komferénsia imprensa, kinta (22/07/21) iha sede ACBN Balide, Dili.

Lídia Antónia konsidera, to’o oras ne’e, PPL enkuadramentu jurídiku Orsamentu no JFP ne’e, PN la konsulta ho entidade sira hanesan, akadémiku, sosiedade sivil, setór privadu no seluk tan hodi komprova katak, lei n°.13/2009 ne’e la adekuadu ona bá evolusaun sistema finanseira estadu nian.

“PPL enkuadramentu OJE no JFP ne’ebé iha diskusaun sei iha lakunas barak tebes. PPL ne’e seidauk konsulta ho setores sosiál, ekonómiku ne’ebé relevante, falta konsulta ne’ebé luan so mai hatudu de’it karakter prosesu lejislativu ne’e, tanba haree bá ita-nia mandatu besik remata ona, sorin seluk la kumpre normais konstitusionais ne’ebé hatur iha artigu 46 númeru 1 konstituisaun RDTL,” afirma Lídia.

Sorin seluk, Porta-voz Movimentu Akadémiku Pro-konstituisaun (MAPK), Hugo Lourenço reforsa, rajaun governu ho PN hakarak halo alterasaun bá lei, tanba ho rajaun atu halo jestaun bá rísku.

Maibé, sira prevé ona osan ho montante billiaun $ 3 iha PPL refere, nune’e, bainhira sira ka’er governu, la presiza ona halo aprovasaun bá OJE liu husi PN.

“Jestaun rísku ne’e katak, orsamentu jerál estadu laiha, sira prevé ona orsamentu ne’ebé sira halo iha projetu lei ne’e ho $ 3 billoens, quer dizer que orsamentu jerál estadu la liu agora, sira la presiza ona orsamentu jerál estadu, sira iha tiha ona fundus ne’ebé mak sira tau ketak hodi bele ezekuta orsamentu bá projetu polítiku governasaun ida-ne’e, entaun ida-ne’e la di’ak,” deklara Hugo.

Tanba ne’e Hugo hatutan, bainhira proposta alterasaun bá enkuadramentu jurídiku OJE no lei JFP ne’e aprova duni, maka Timor-Leste sei sai nasaun ditadura.

“Ida-ne’e ita kontra ona konstituisaun Repúblika kontra ona ita-nia lei orsamentu jerál estadu ne’ebé kapás durante ne’e ita utiliza normál transparánsia loos, sé ida-ne’e mak ita bele halo ita orienta ona bá kontra konstituisaun ita sai ona governasaun ida ditadura,” tenik nia.

UMDP mós sei aprezenta pareser bá Prezidente Parlamentu Nasionál, Aniceto Guterres, hodi atu hapara ona diskusaun bá alterasaun PPL enkuadramentu jurídiku OJE no lei JFP ne’e.

Alem de ne’e, UMDP mós sei entrega pareser refere bá embaixada sira-ne’ebé rezidente iha Timor-Leste.(ant)