Uma Kreda Katólika Hakarak Povu Sente Benefísiu Husi OJE 2022

Smnewstl.com 31-12-2021 (Dili) — Uma Kreda katólika Timor-Leste iha esperansa no hakarak povu Timor-Leste tenki sente duni benefísiu husi Orsamentu Jerál Estadu (OJE) tinan fiskál 2022 ne’ebé Parlamentu Nasionál (PN) kuaze billiaun $ 2 resin.

Administradór Parokiál Parókia Katedral Dili, Padre Leandro Maria Alves hateten, orsamentu ne’ebé aprova iha PN ne’e, tenki aselera investe bá setór produtivu sira no mós bá bem estar povu nian, nune’e bele kore povu husi ki’ak no mukit.

“Ita-nia hakarak ne’e mak ne’e mak bem komún ita-nia povu nian, ne’eduni ita hein katak, husi orsamentu ne’e bele to’o bá povu sira hotu ne’ebé mak halerik, bele koko, bele sente no bele dehan katak, loos duni orsamentu ne’e povu nian, no povu agora sente duni orsamentu aprova ne’e, tanba governu hakarak povu ne’e moris di’ak,” dehan Pade Leandro Maria, iha Igreja Karedral, Dili, sesta ne’e.

Padre Leandro hatutan, haree bá realidade ne’ebé akontese liu husi OJE 2021 ne’e, maski orsamentu ho montante boot, maibé povu la sente no sei kestiona nafatin, kona-ba eletrisidade, bee-moos no saneamentu, edukasaun, saúde no seluk tan.

“Mai ida-ne’e ita haree liu husi realidade ne’ebé mak akontese, no tebes duni katak, iha 2021 alem de orsamentu ne’e iha, iha mós situasuan ida-ne’ebé mak dala barak povu sira mós sei kestiona nafatin kona-ba ahi, estrada, bee parte edukasaun ninian, povu nia halerik,” subliña nia.

Ho situasuan hirak ne’e, povu bolu atensaun ba na’i ulun sira atu konsidera netik preukupasaun povu nian nune’e, iha tinan foun ne’e bele responde di’ak liután bá nesessidade ou halerik ne’ebé povu sira hato’o bá ukun na’in sira.(ant)