UEP-CSP Preparado Asegura Seguransa ba Alta Entidade VIP

Smnewstl.com 25-01-2022 (Dili) — Membru Polísia Nasionál Timor-Leste (PNTL) husi kompañia Korpu Seguransa Pessoál (CSP) na’in 24 partisipa iha segundu turnu kursu bázika espesialidade durante fulan ida hodi hasa’e sira-nia abilidade no kuiñesimentu bainhira fó seguransa bá alta entidade ka VIP membru governu no eis titulár sira.

Kamandante Corpo Seguransa Pessoal (CSP), Inspector Chefe, Marcos Lopes, formasaun ne’e realiza bazeia bá planu CSP nian ne’ebé hetan aprovasaun husi Komandante Jerál PNTL, Komisáriu Faustino da Costa iha tinan kotuk.

“Partisipantes segundu kursu totál 24 pessoaa, mane 22, feto 2 pessoas. Husi formasaun báziku ida-ne’e ho objetivu atu hasa’e sira-nia no abilidade no mós atitude pessoál sira-nian hodi hala’o servisu operasionál iha terenu ho profisionál no tuir prosedimentu ne’ebé iha,” dehan Inspetór Xefe Marcos Lopes, iha diskursu bainhira abertura bá formasaun bázika ne’ebé hala’o iha Komandu Unidade Espesiál Polísia (UEP) Bairru-Pite, Dili, Tersa ohin.

Komandante CSP ne’e hatutan, kursu ne’e realiza mós tanba, iha 2018 to’o 2021, membru CSP foun lubun ida ne’ebé mai husi kontijente jerál, VIP, COE no pelotaun apoiu servisu barak mak fó apoiu seguransa ka skoltu bá membru governu sira no alta entidade sira mak la liu husi selesaun no prienxe rekizitus ruma, tanba nomea direta husi alta entidade sira.

“Bá partisipante segundu turnu kursu bázika espesialidade CSP nian, husu bá ajente sira bá partisipante sira, hatudu disiplina nafatin hodi kumpre regras ne’ebé iha, aproveita saida mak instruktur sei fó bá imi, espera katak, sei kumpre instruktur ko’alia imi sei aprende saida mak instruktur hanorin,” subliña nia.

Komandante UEP, Superintendente Xefe Orlando Gomes husu partisipante sira atu aproveita didi’ak formasaun ne’e, nune’e bele aumenta tan kapasidade no kuiñesimentu tékniku no tátika, nune’e mosu situasuan extra-ordináriu ruma, bele atende ho lalais hodi salva VIP bá fatin seguru.

Orlando Gomes hatutan, servisu seguransa pessoál servisu ida todan bá ita-boot sira, tanba ne’e, presiza halo ho fuan no laran atu proteje entidade ka VIP sira.

“Sé karik ita-boot sira la hetan treinamentu ka formasaun ida-ne’ebé mak di’ak liu, karik mosu situasuan ruma, ita-boot sira dúvida atu foti desizaun, ita-boot sira dúvida atu halo atuasaun, ita-boot sira dúvida oinsá mak atu lori ita-nia VIP bá fatin ne’ebé seguru, ne’e jestaun bá ita-boot sira, tanba ita-boot sira mínimu bá treinamentu,” dehan Komandante UEP, Superintendente Xefe Orlando Gomes.

Orlando Gomes akresenta, formasaun ne’e hala’o bazeia bá dekretu-lei n°.09/2009 CSP nian, tan ne’e, hanesan membrus PNTL iha CSP sai hanesan autór prinsipál atu halo protesaun no evakuasaun bá entidade sira, ne’eduni presiza treinu tékniku bá seguransa pessoál ninian.

Entretantu, formasaun primeiru turnu hala’o ona bá membru CSP na’in 17 iha tinan kotuk, no iha tinan 2022 ne’e, bá membru na’in 24.

Instruktur bá formasaun primeiru turnu no segundu turnu na’in 7 mai husi UEP no CSP rasik no apoiu husi asessor husi Portugál.

Komandu Unidade Espesial Polísia (UPE) ka Corpu Segeransa Pesoál (CSP) hanesan unidade rezerva ida, ho efetivu variável, ne´ebé atua tuir orden husi Komandante-Jeral, iha situasuan reforsu ba Komandu Distrital sira ka iha situasaun kumprimentu misaun autónoma.

Unidade Espesial Polisia iha elementu sira ke preparadu no treinadu atu kumpri misaun sira hanesan, rezolusaun no jestaun insidente krítiku.

Intervensaun tátika iha situasaun violénsia konsertadu ka ho perigu ne´ebé aas, kompleksu no ho risku. Manutensaun no restabelesimentu orden públika. Seguransa no protesaun ba entidade bo´ot. Seguransa ba eventu bo´ot sira.

Inativasaun explozivu no exekusaun buska preventivu sira. Seguransa instalasaun sensível, preferensialmente iha situasaun apoiu ka reforsu. Preparasaun no projesaun forsa ba misaun internasionál.(ant)