Tribunál Rekursu Haruka Fila Lista Kandidatura Armanda Berta

Smnewstl.com 28-01-2022 (Dili) — Tribunál Rekursu haruka fila ekipa susesu Kandidatu Prezidente Repúblika, Armada Berta dos Santos, tanba dokumentu ne’ebé aprezenta seidauk kompletu.

Prezidente Ekipa Susesu Nasionál, Marito Magno hateten, maske dokumentu ne’ebé sira bá rejista iha Tribunál Rekursu konfirmadu ona, maibé Tribunál Rekursu tenki haruka fila, tanba lista apoiante ne’ebé sira hatama la’ós eletrónika no tau iha USB, maibé mannual de’it.

“Sira presiza soft copy ne’e mak agora ami servisu hela tuku 3 ami mai kompleta fali tau iha USB, ida mannual ne’e kompletu ona, presiza eletróniku, sira konfirmadu hela de’it ida-ne’e,” dehan Prezidente Ekipa Susesu Nasionál, Marito Magno, iha Tribunál Rekursu, sesta ohin.

Marito Magno dehan, dokumentu sira-ne’e sira lori fila hotu, atu kompleta dokumentu eletrónika no tau iha USB, hafoin bá rejista fila-fali.

“Seidauk sei hein ida-ne’e, ne’ebé sira ami kompleta, tanba ida-ne’e mak sira haruka ami lori fila dokumentu ne’e, ami tenki lori fali par ami haree tuir fali par ami ketik foun fali mak lori bá,” subliña nia.

Marito hatutan, lista apoiante ne’ebé sira rekolla hamutuk rihun 10 resin mai husi Munisípiu 12 inklui Rejiaun Oe-cusse no Munisípiu Ataúro, maibé Diresaun Nasionál Rejístu Notariádu, halo aunténtikasaun, hetan de’it rihun 8.641.

“Iha 8.641, maibé antes ne’e rekolla kuaze 10 mill resin, maibé kuandu notariádu halo verifikasaun autentikadu hetan de’it 8.641, mais husi 14 munisípiu, 12 munisípiu inklui RAEOA no Ataúro mai ho lista ketak,” tenki nia.

Maski nune’e Prezidente Ekipa Susesu ne’e afirma, kandidatu Armanda Berta dos Santos seidauk suspende nia pozisaun nu’udar Vise Primeira-Ministra no Ministru Solidariedade Sosiál no Inkluzaun (MSSI), tanba sei hein notifikasaun husi Tribunál Rekursu.

Tan ne’e nia afirma, bainhira Tribunál Rekursu notifika ona Armanda Berta dos Santos nu’udar kandidatu, maka sei suspende pozisaun nu’udar Vise PM no MSSI durante periódu kampaña.(ant)