Tribunal Liberta Liborio Pereira, Problema Aeroporto Failansu Husi MNEC ho MP

Smnewstl.com 07-11-2021 (Dili) – Tribunál Distritál Dili (TDD) Domingu ne’e halao julgamentu primeiru interrogatóriu bá arguidu eis Prezidente Komisaun Funsaun Públika (KFP), Libório Perreira, ne’ebe kapturado horseik Sabado, (06-11-2021), iha Aeroporto Internacional Nicolao Lobato Comoro Dili.

Iha julgamento primeira interogatorio ne’e deside fó liberdade imediata bá arguidu, tanba Ministériu Públiku la hatudu provas foun ruma.

Advogadu Privadu, Napoleão de Oliveira Carvalho hateten, iha audiénsia primeiru interrogatóriu ne’e, Ministériu Públiku la hatudu provas foun bá sira-nia kliente.

Maibé, Ministériu Públiku sujere bá tribunál halo alterasaun bá medidas koasaun Termu Identidade Rezidénsia (TIR) aumesmu tempu hakarak mós aplika tan medidas koasaun proibisaun de auzénsia, nune’e bá oin Libório Perreira labele sai husi Timor-Leste.

Ba desizaun ne’e hanesan defesa, Napoleão afirma, la satisfas no promete hamutuk ho Defensor Públiku Jerál, Sérgio Quintas sei halo rekursu.

Napoleão esplika, razaun Liborio aujensia tamba atu halo servisu estadu nian ho ekipa husi Ministériu Negósiu Estranjeiru no Kooperasaun (MNEK) bá interese estadu. La’ós interese privadu inklui sira-nia kliente la’ós atu halai husi justisa.

“Maibé por lapsu oan ruma iha, ohin ami mai iha ne’e, Ministériu Públiku sujere para atu halo alterasaun bá medidas koasaun ida-ne’e, aumesmu tempu aplika TIR hakarak mós proibisaun de auzénsia, despaixu primeiru interrogatóriu mós tun, maibé la to’o ne’e de’it, ha’u ho Doutór Quintas sei esforsu par atu halo rekursu, tanba ami mós la satisfas ho despaixu ida-ne’e, tanba ami-nia asistidu la’ós atu halai husi justisa,” dehan Advogadu Privadu, Napoleão Carvalho, iha TDD, domingu ne’e.

Nia hatutan, iha desizaun anteriór, tribunál aplika medidas koasaun TIR bá arguidu no proibisaun de auzénsia maibé, defeza halo rekursu, ikus mai tribunál rekursu afavór bá pedidu defeza nian, nune’e medidas proibisaun de auzénsia labele funsiona, maibé nafatin sujeita bá TIR.

Nia informa tan katak, sira-nia kliente durante ne’e koopera tebes ho justisa, tan ne’e garante, arguidu sei la halai ses husi justisa.

“Ema ne’e kooperative tebes ho justisa, nia nunka um minutu de’it mós nia la ses husi justisa, nune’e ami mós la satisfas ho despaixu ne’ebé mak iha. Por lapsu ne’ebé ohin ami haree quer dizer dehan hanesan ne’e, ohin sira dehan, kuandu halo traballu forra husi 15 dias tenki informa, maibé tanba sá mak ami la informa, ida-ne’e mak ami sei haree par atu halo rekursu,” afirma nia.

Napoleão Carvalho akresenta, fallansu ne’ebé akontese iha aeroportu Comoro ne’e, entre MNEK ho Ministériu Públiku nian, tanba sira mak laiha koordenasaun bá malu.

“Ida-ne’e problema entre MNEK ho Ministériu Públiku, ne’e estadu ho estadu, ami defeza halo ami-nia servisu asegura ami-nia kliente, maibé despaixu ne’e tun hanesan ne’e ona, erru ne’e sé nia erru, estadu ho estadu husu malu, mais ida-ne’e por lapsu ida, maibé ami buka jeitu ami sei halo rekursu ami mós la satisfas ho despaixu ne’ebé ohin dehan,” dehan nia.

Sorin seluk, Defesor Públiku, Sérgio Quintas, lamenta ho atuasaun Polísia nian iha aeroportu bá sira-nia kliente Libório Perreira, tanba kria manobra oin-oin durante oras tolu nia laran ho objetivu atu halo fragante delitu hasoru asistidu.

“Manobra ne’e Polísia sira iha aeroportu, tuir loloos nia informa bá señór Libório katak, nia naran ne’e iha tiha ona iha sistema, bandu nia par labele sai bá estranjeiru, tanba sei aplika hela medidas koasaun TIR, kuandu nia sai karik informa bá Ministériu Públiku, mais ho ida-ne’e de’it señór Libório hatene katak, nia labele bá nia bele fila, mais no fim Polísia haruka hein, la’e iha posibilidade bele halo viajen hein to’o oras tolu par atu justifika sira-nia aktu ida-ne’ebé laloos hodi justifika katak, señór Libório ne’e ka’er tanba liu husi fragante delitu ne’e laloos,” lamenta nia.

Sérgio Quintas hatutan, situasuan ne’ebé akontese iha aeroportu ne’e erru Ministériu Públiku nian, tanba la informa bá arguidu kona-ba rekizitus medidas koasaun TIR ne’ebé tribunál aplika.

Maski nune’e, Sérgio Quintas realsa, sira-nia kliente Libório Perreira halo viajen bá li’ur integra iha ekipa ho MNEK, no uza passaporte diplomátiku, tanba ne’e la’ós atu halai ses husi justisa.

“Libório nia deslokasaun bá iha estrajeiru ne’e la’ós nia mesak de’it, integra ho ekipa, ekipa husi negósiu estranjeiru, nia halo servisu estadu nian iha rai li’ur, nia bá mós nia la utiliza passaporte privadu, passaporte diplomátiku, entaun kulpa ne’e bá Ministériu Públiku ne’ebé ka’er prosesu ne’e mak devia informa bá sidadaun ne’e katak, ita-boot sei sujeitu bá TIR kuandu ita sai fó hatene ha’u,” subliña nia.

Entretantu, Ministériu Públiku akuza arguidu Libório Perreira ho krime partisipasaun ekonómika no negósiu, bainhira asume hela funsaun nu’udar Prezidente KFP.

Alem de ne’e, iha loron 6 fulan Novembru, Polísia Servisu Investigasaun Kriminál Munisípiu Dili, kaptura Libório Perreira iha aeroportu Comoro, bainhira ho ekipa MNEK atu halo viajen traballu bá estranjeiru.

Maibé, la konsege, tanba autoridade seguransa iha aeroportu la autoriza.

Entretantu, audiénsia primeiru interrogatóriu ne’e, prezide husi Juíza, Ana Paula Fonseca, Ministériu Públiku reprezenta husi Prokuradora, Lídia Soares no arguidu hetan asisténsia legál husi Advogadu Privadu, Napoleão de Oliveira Carvalho ho Defensor Públiku, Sérgio Quintas.(ant)