Tribunal Hahu Rona Deklarasaun Xanana Gusmao ba Kazu Eis Padre Dasbach

Smnewstl.com 30-09-2021 (Dili) – Lider Nacional, Kay Rala Xanana Gusmao marka ona nia prezensa lokoraik ne’e iha Tribunal Distrital Oecusse hodi fo sasin kona ba kazu Topu Honis, ne’ebe diskumfia envolve Eis Padre Dasbach ligado ho abuzu sexual ba orfaun sira.

Eis Presidente Republika no Primeiro Ministro ne’e to’o Tribunal iha tuku ida liu minutu lima nulu resin lima akompanha husi nia seguransa pesoal nain ha’at. Enkuanto julgamentu halao iha tuku rua liu minutu sanulu resin lima oras Timor Leste.

Iha biban ne’e marka prezensa mos husi Padre Hermino, ne’ebe Tribunal notifika tamba relatorio investigasaun ba kazu Topu Honis envolve eis Padre Dasbach diskumfia ‘koak’ ba publiku.

Momentu neba, Padre Herminio hanesan Diretor ba Komisaun Justisa e Paz lidera ekipa hodi halo imvestigasaun ba kazu refere, hetan kuinesimentu husi Arse Bisbo Diocese Dili no nia relatorio ida intrega ba Kay Rala Xanana Gusmao ho kapasidade hanesan lideransa nacional.

Tamba relatorio ne’e sai ba publiku, entaun Tribunal mos notifika Padre Hermino no Kay Rala Xanana Gusmao mos sai sasin ba kazu ne’e no horseik Kuarta-feira, 29-09-2021, Tribunal rona uluk ona Padre Herminio .

Ligado ba kazu ne’e, Xanana Gusmao rasik hanesan reafirma ona antes katak, labele hare nia prezensa hanesan atu halo intervensaun ba prosesu judisial, maibe hakarak akompanha hodi hatur justisa ho lolos.

Antes ne’e, Tribunal mos rona ona testamunha husi Padre SVD inklui Komisaria Direitu Labarik.

Julgamentu ba kazu ne’e lidera husi Juiz Kolektivo Yudit Pamukas, Hugo da Crus Pui no Evangelino Belo. Ministerio Publiku reprezenta husi Matias Soares.

Eis Padre Dasbach hetan asistensia legal husi advogado Eusebio Guterres, Miguel Faria, Pedro Aparico inklui advogado rua seluk tan.(Rio)