Transporte Avaria, Operasaun Policia Transito Nacional Parado

Smnewstl.com 22-11-2021 (Dili) – Komandu Polísia Munisípiu Dili liu husi Seksaun Tránzitu Nasionál durante semana ida ona labele halo servisu liu-liu kona-ba kontrolu movimentu rodoviáriu no mós atende asidente iha kapitál Dil kauza husi transporte ne’ebe utiliza hanesan motor ho kareta maioria a’at ka avaria hotu.

Komandante Polísia Tránzitu Nasionál, Inspetór Xefe Domingos Sarmento Gama justifika, semana ida ona Polísia Tránzitu Seksaun Munisípiu Dili labele halo operasaun no mós atende asidente sira iha kapitál Dili ho urjente tamba infrenta problema trabsporte.

“Balun lamentável ho Polísia Tránzitu ninia atendimentu kada ves asidente sira atendimentu tarde, bá movimentu seguransa rodoviáriu mós kada ves ita-nia kontrolu ladún másimu, rajaun tanba kondisaun transporte ne’ebé mak Polísia Tránzitu iha, kuaze totalmente aat. Entaun sé kondisaun transporte mak la ajuda ita-nia atividade totalmente paradu, la signfika paradu hotu,” dehan Inspetór Xefe Domingos Gama, Segunda ne’e iha knár Komandu Polísia Munisípiu Dili.

Inspetór Xefe Domingos Gama afirma, Komandu Polísia Munisípiu tenta husu apoiu transporte bá Komandu Jerál Polísia Nasionál Timor-Leste (PNTL), maibé laiha resposta, tanba eskuádra polísia no mós seksaun sira hasoru hotu problema hanesan.

Maske nune’e, Gama fundamenta, problema hirak ne’e la sai kestaun no mós la hamate sira-nia espíritu atu kontinua halao servisu hodi kontribui reseitas ba kofre estadu.

“Ita iha vontade servisu, maski kondisaun bá Tránzitu Munisípiu Dili ne’e ladún kondiz par ita atu halo servisu, maibé ami iha vontade mak kada ves ami, ami mós konsege hatama osan bá konfre estadu, nune’e mós iha kazu lubuk ida mak ita halo prosesu,” afirma nia.

Inspetór Xefe ne’e subliña, servisu tránzitu rodoviáriu Importante iha nasaun ida, tan ne’e bele kontrola di’ak liután movimentu rodoviáriu atu bele la’o ho di’ak no organizadu liu.

Nune’e, husi Komandu Polísia Munisípiu halo esforsu hodi husu apoiu bá Komandu jerál atu bele apoiu transporte ruma, maibé la konsege, tanba eskuádra ho seksaun sira mós menus transporte atu apoiu sira.

Entretantu, Polísia Tránzitu Nasionál iha veíkulu hamutuk 14, entre veíkulu hirak ne’e, kompostu husi motorizada hamutuk 10 no mós kareta pick-up 4 ne’ebé sosa iha tinan 2007 no 2008, maibé veíkulu sira-ne’e daduak ne’e avaria hotu.

Alem de ne’e, iha tinan 2021 ne’e, Seksaun Tránzitu Munisípiu Dili hatama ona osan bá kofre estadu $ 250 mill ne’ebé kobre husi infrator sieaneje viola kódiku estrada no seluk tan.(ant)