TL – Portugal Sei Haforsa Koperasaun Iha Area Edukasaun

smnewstl. com – Ministra Edukasaun Dulce de Jesus Soares ho Sekretáriu Estadu ESGTV Domingos Lopes Lemos hala’o enkontru ho Embaixadora Portugal iha Timor-Leste, Manuela Bairos hodi ko’alia kona-ba apoiu kooperasaun ne’ebé governu Portugal halo ba Ministériu Edukasaun liuliu iha área eskola CAFE, iha salau VIP Ministériu Edukasaun, Vila-Verde.

Durante entrevista, Ministra Edukasaun Dulce de Jesus Soares hateten katak iha sorumutu ne’e ko’alia mós kona-ba posibilidade hodi haluan projetu eskola CAFE ne’ebé hakerek ona iha planu Governu Konstitusionál da-9 nian.

“Atu reforsa apoiu sira ne’ebé iha ona, hanesan iha parte eskola CAFE ami ko’alia hela iha anu letivu foun, posibilidade aumenta tan profesóres hamutuk 130 ba 150”, dehan Ministra Edukasaun.

Governante ne’e hatutan, sei haree fila fali mós oinsá mak iha projetu Pro-Portugés bele sai di’ak liután, tanba agora fó formasaun ba profesóres ne’ebé la hanorin iha eskola CAFÉ. Iha tinan 2024 sei fó tan formasaun lian Portugés ba profesóres kuaze 2000 ba leten.(SMNews)