TL ho Mosambike Diskute Refosu Kooperasaun

Smnewstl.com – Ministru Negósius Estranjeirus no Kooperasaun (MNEK), Bendito dos Santos Freitas, ho delegasaun, hala’o enkontru bilateral ho Ministra Negósius Estranjeirus no Kooperasaun Mosambike, Verônica Mocamo, ho Membru Governu, hodi diskute kona-ba reforsu kooperasaun bilateral entre nasaun rua iha setór importante sira.

Enkontru bilateral ne’e hala’o iha ámbitu vizita ofisiál Prezidente Repúblika, José Ramos-Horta ba Mosambike hahú iha loron 3 to’o loron 7 fulan Jullu tinan ida-ne’e, hodi atende ba konvite husi Xefe Estadu Mosambike, Filipe Jacinto Nyusi.

Hafoin remata enkontru, Ministru Bendito Freitas informa, Ministra Negósius Estranjeirus no Kooperasaun Mosambike, manifesta Governu Mosambike nia prontidaun hakarak servisu hamutuk ho Governu Timor-Leste.

“Apezar de distánsia geográfikas ne’ebé Timor-Leste ho Mosambike iha, nu’udar paíz irmaun, povu irmaun, sira mós desmontra teb-tebes sira-nia disponibilidade, sira-nia prontidaun atu bele apoiu Timor-Leste iha área saida de’it. Ministra ho elénku Governamental partisipa hotu iha reuniaun ne’e, ko’alia kona-ba setór saúde, edukasaun, defeza, rekursu marinus, rekursu naturais, teknolojia importante tebes atu bele halo kooperasaun iha,” dehan Ministru Bendito.

Governante ne’e hatutan, iha vizita Xefe Estadu ne’e, Governu Timor-Leste ho Mosambike sei asina akordu kooperasaun iha setór importante hanesan edukasaun, minerais (hidrokarbinetus no minas) no seluk tan.

“Assuntu importante ne’ebé hanesan parte integrante husi vizita ida-ne’e mak, ita iha akordus tolu ne’ebé sei asina ho Mosambike. Ida mak akordu atu promove kooperasaun ba karbonetus no minas nian, ida edukasaun iha nível ensinu superior no terseiru mak kria mekanízmus de konsulta no diskusaun ba kooperasaun,” tenik nia.

Iha área edukasaun, Governante ne’e hatutan, presiza dezenvolve liután kooperasaun ho Governu Mosambike kona-ba eskola CAFÉ inklui mós setór justisa nian, nune’e bele kontribui ba dezenvolvimentu kapital umanus iha Timor-Leste iha futuru.

Iha biban ne’e mós, Ministru Negósius Estranjeirus Bendito Freitas, lori Governu Timor-Leste nia naran, agradese ba Governu no Povu Mosambike, ne’ebé apoia ona Timor-Leste iha tempu luta ba ukun rasik aan.

Tanba ne’e, Ministru Bendito espressa vontade husi IX Governu Konstitusional ne’ebé lidera husi Primeiru-Ministru, Kay Rala Xanana Gusmão, atu fortifika liután relasoens bilaterais ho Mosambike liu-liu iha espasu luzofonia ho nasaun memhru CPLP sira.

Alende ne’e, Governu Mosambike mós sei konvida Timor-Leste atu partisipa iha expozisaun turízmu ne’ebé sei hala’o iha loron 8 to’o 11 fulan Agostu tinan ne’e iha Mosambike. (*/Smnews)