TL Ho KUBA Kontinua Programa Ekivalensia iha Ensinu Sekundáriu

Smnewstl. com – Governu Kuba kontinua apoia implementasaun Programa Ekivalénsia iha Ensinu Sekundáriu no deklara reforsu kooperasaun ho Timor-Leste iha seitor edukasaun.

Disponibilidade governu Havana deklara husi Embaixadora Kuba iha Timor-Leste Alina Aldama Innis, hafoin hasoru malu ho Ministra Edukasaun, Dulce de Jesus Soares iha Vila Verde Díli.

Durante ne’e, formasaun ekivalénsia to’o iha nível ensinu báziku no governu Kuba hakarak alarga tan to’o sekundáriu, hodi ajuda ema ho nesesidade espesiál, atu asesu ba edukasaun.

“Iha esperénsia pasadu ne’ebé servisu hamutuk ho governu Kuba iha mós formasaun ba profesór no profesora sira ba edukasaun fízika, maibé infelizmente la iha kontinuidade mós iha Ministériu Edukasaun no ami haree katak hakarak hamoris fila fali jinástika ba eskola sira iha Timor laran tomak”, dehan Ministra Edukasaun, Dulce de Jesus.

Programa ne’e Kuba hakarak apoia mak loke diskussaun ho UNTL atu haree karik presiza apoiu ruma iha língua Español antes tama ba Fakuldade Medisina iha UNTL.(SMNews)