TL-Australia Hahu Diskuti Planu Kombate Trafiku Umano Iha Rai Laran

Smnewstl.com 10-11-21 (Dili) – Tinan oin 2022, Ministériu Interiór sei servisu hamutuk ho parseiru dezenvolvimentu sira atu hahú halo treinamentu bá membru Polísia Nasionál Timor-Leste (PNTL), Protesaun Sivíl no Servisu Imigrasaun kona-ba kombate krime tráfiku umanu iha Timor-Leste.

Vise-Ministru Interiór, António Armindo, hasoru malu ho Home Affairs husi Embaixada Austrália iha Timor-Leste, Wanda Sendzimir, Kuarta-feira ne’e iha Edifisio Kaikoli Dili no hahu diskuti ona planu implementasau.

Executivo ne’e dehan, governu ho parseiru dezenvolvimentu sira preukupa ho tráfiku umanu iha Timor Leste nune’e presiza tau atensaun sériu, tanba Timor-Leste mós tama ona iha world list two.

“Enkontru ho home affairs husi Embaixada Austrália ko’alia kona-ba oinsá mak ita bele hahú ona implementa programa refere nune’e governu fó ona kompeténsia bá Ministériu Justisa atu hahú inisia inklui kolabora ho entidades relevantes hanesan gabinete Primeiru-Ministru, Ministériu Prezidénsia Konsellu Ministru no mós Ministériu Interiór nomos Servisu Imigrasaun ho Protesaun Sivíl,”tenik Armindo

Governante ne’e hatutan, nia parte mos ko’alia ona ho parseiru husi IOM, no sei husu mós apoiu husi TLPDP, nune’e bele apoiu hodi hamutuk kombate masske seidauk iha númeru ejatu kona-ba krime tráfiku umanu iha Timor-Leste.

Programa refere tuir Armindo, sei implementa iha fulan Janeiru 2022, tanba dadauk ne’e, Ministériu Interiór sei prepara hela ninia planu estratéjiku ba implementasaun. (ant)